काठमाडौं । संसदमा प्रमुख प्रतिपक्षको लगातारको अवरोध खुलाउने प्रयास स्वरुप सभामुख अग्नि सापकोटाले बोलाएको सर्वदलीय बैठक बिनानिष्कर्ष सकिएको छ ।
संसद भवन बानेश्वरमा सोमबार बसेको बैठकमा संसद अवरुद्ध गराउने प्रमुख प्रतिपक्ष एमाले नै सहभागी नभएपछि बैठकले कुनै निकास दिन नसकेको बैठकमा सहभागी नेताहरुले बताएका छन् । बैठकमा उपस्थित नेताहरुले सभामुखलाई पुन प्रतिपक्षसँग वार्ता र संवाद गरेर निकास खोज्न सुझाव दिएर बैठक सकिएको सहभागी एक नेताले बताए ।
प्रतिपक्ष एमाले बैठकमा सहभागी नै नभएपछि कुनै निचोडमा पुग्न नसकेको लोकतान्त्रिक समाजवादी पार्टीका अध्यक्ष महन्थ ठाकुरले बताए । अध्यक्ष ठाकुरले एमाले प्रति ब्यङ्ग गर्दै भने ‘पहिला पनि ५९ दिनसम्म संसद अवरुद्ध भएको थियो, अहिले त २,३ दिनमात्र भएको छ ।’
राष्ट्रिय जनमोर्चाकी सांसद दुर्गा पौडेलले संसद सहज रुपमा सुचारु गर्न बैठक आव्हान गरेपनि प्रतिपक्ष नआएकाले कुनै निष्कर्षमा पुग्न नसकिएको जानकारी दिइन् ।
प्रतिक्रिया