सत्तामा छँदा असाधारण काम गरेका छौं, चुनावमा एजेण्डाको कमी छैन : ओली

काठमाडौं । नेकपा एमालेका अध्यक्ष केपी शर्मा ओलीले सत्तामा भएको समयमा असाधारण काम गरेको दाबी गरेका छन् ।

केन्द्रीय कमिटीको आइतबारको बैठकलाई सम्बोधन गर्दै अध्यक्ष ओलीले सरकारको नेतृत्वमा भएका बेला असाधारण काम गरेको दाबी गरेका हुन् । राजनीतिक प्रतिवेदनमाथि केन्द्रीय सदस्यहरुले उठाएका प्रश्नको जवाफ दिँदै ओलीले सरकारमा हुँदा गरेका कामहरुको फेहरिस्त नै प्रस्तुत गरे । उनले धेरैले सिक्नुपर्ने गरी आफ्नो नेतृत्वको सरकारले सरकारले काम गरेको बताए ।

अध्यक्ष ओलीले राम्रो काम गरेका कारण चुनावमा आफुहरुलाई कुनै समस्या नभएको जिकिर गरे । उनले चुनावमा जाने एजण्डा के बनाउने भन्ने अवस्था आफ्नो पार्टीलाई न भएको बताए । एकपटक प्रतिपक्षमा पुग्यौं भन्दैमा आत्तिनु नपर्ने बताउँदै ओलीले फेरि सम्हालिएर अघि बढ्न सक्ने प्रतिवद्धता जनाए ।

ओलीले राजनीतिक प्रतिवेदनमा भविष्यलाई निर्दिष्ट विचार र गन्तव्य रहेको बताए । अहिले पार्टीको ध्यान महाधिवेशन र संगठन निर्माणमा हुनुपर्ने उनले धारणा राखे ।