बुटवल । नेपाली कांग्रेसले बुटवलको ज्योतीनगर लक्ष्मीनगर क्षेत्रका पहिरो प्रभावितहरुलाई राहत प्याकेज ल्याउन तथा अल्पकालिन र दीर्घकालिन व्यवस्थापनको माग गर्दै लुम्बिनी प्रदेश सरकारलाई ज्ञापन पत्र बुझाएको छ ।
मंगलबार नेपाली कांंग्रेस बुटवल नगर समितिको मुख्यमन्त्री तथा मन्त्रीपरिषदको कार्यालयमा पुगेको टोलीले मुख्यमन्त्री कुलप्रसाद केसीलाई भेटेर पहिरो प्रभावितलाई राहत तथा उनीहरुलाई तत्काल व्यबस्थापन गर्न माग गरेको हो ।
ज्ञापन पत्र बुझाउँदै कांग्रेस बुटवल नगर समितिका सभापति खेलराज पाण्डेले यो विषयलाई गम्भिरतापूर्वक लिन मुख्यमन्त्री केसीलाई आग्रह गरे । त्यस्तैगरी कांग्रेसले तिनाउ दानव नदिको कटानका कारण भएको क्षती प्रति पनि गम्भिर बन्न आग्रह गर्दै उनीहरुलाई समेत राहतको व्यवस्था गर्न र तटवन्धनको प्रवन्ध मिलाउन माग गरेको छ ।
कांग्रेसले कालिका पथ सडक बिस्तार, वेलवास-वेथरी सडक र आउँदै गरेको चाडपर्वको समयमा मुल्यबृद्धि र कालोवजारी हुन नदिन सरकारलाई गम्भिर बन्न आग्रह गरेको छ । नगरभित्र भएका बिभिन्न मुद्धा उठान र समाधानका लागि पहल गरेर मात्रै कांग्रेस पार्टी कार्यालयमा जाने सभापति पाण्डेयले बताए ।
ज्ञापन पत्र बुझ्दै मुख्यमन्त्री केसीले प्रदेश सरकारले पहिरो प्रभावितलाई राहत, उद्धार र व्यबस्थापनलाई प्राथमिकता दिएको र यसले केहिदिनमै ठोस उपलब्धि निकाल्ने बताए ।
उनले त्यसको लागि सरकारको तर्फबाट तथ्यांक संकलनको काम भईरहेको र चाडपर्व अघि नै राहत दिनेगरी सरकारले तयारी गरेको जानकारी समेत गराए ।मुख्यमन्त्री केसीले तत्काल राहत तथा पुनःस्थापनका लागि जिल्ला प्रशासन कार्यालयले तथ्याङ्क संकलनका लागि निर्देशन गरिएको र मंगलबार सरोकारवालाका बिचमा बैठक राखिएको बताए ।
सोहि अवसरमा कांग्रेसले लुम्बिनी प्रदेशका शहरी बिकास तथा पर्यटन मन्त्री डिल्ली चौधरीलाइ पनि सोही ब्यहोराको पत्र बुझाएको हो । सो कार्यक्रम कांग्रेस नगर सचिव छायाँ पोखरेलले संचालन गरेका थिए ।
प्रतिक्रिया