आफैले अदालतमा मुद्दा दिएको विषयलाई उठाएर प्रमुख प्रतिपक्षले संसद अधिवेशन चल्न दिएन : प्रवक्ता शर्मा

खबर कुरा
२ मंसिर २०७८, बिहीबार
                 

बुटवल । लुम्बिनी प्रदेश सरकारका आन्तरिक मामिला तथा संचार मन्त्री तिलकराम शर्माले लुम्बिनी प्रदेश सरकारले प्रमुख प्रतिपक्षलाई बिच्काएको नभई प्रमुख प्रतिपक्षले सरकारलाई बिच्काएको बताएका छन् । प्रदेश सरकार मन्त्रिपरिषदको निर्णय सार्वजनिक गर्न आयोजित पत्रकार सम्मेलनमा बोल्दै सरकारका प्रवक्ता समेत रहेका मन्त्री शर्माले सिङ्गो अधिवेशन भरी संसद चल्न नदिएर प्रमुख विपक्षीले सरकारलाई बिच्काएको आरोप लगाए ।

मन्त्री शर्माले आफैले अदालतमा मुद्दा हालेको विषयलाई लिएर विपक्षी एमालेले अदालतको फैसला समेत नकुरी संसद अवरोध गरेको बताए । उनले प्रमुख विपक्षीलाई सहमतीमा ल्याउने प्रयासकै कारण बजेट अधिवेशन धेरै लामो भएको बताए । उनले सरकार सकेसम्म अध्यादेश ल्याएर काम गर्ने पक्षमा नरहेको स्पष्ट पार्दै तयारी अवस्थामा रहेका विधेयकहरुलाई आगामी संसद अधिवेशनमा प्रस्तुत गरिने जानकारी दिए । प्रदेश प्रहरी विधेयक, अनुसन्धान विधेयक जस्ता महत्वपूर्ण विधेयक संसदमा लैजाने तयारीमा सरकार रहेको जानकारी दिँदै बुधबार बसेको मन्पिरिषदको बैठकले प्रदेश खेलकुद ऐनलाई प्रदेशसभामा लैजान स्विकृति दिने निर्णय गरेको जानकारी दिए ।

प्रदेश सरकारले प्रस्ताव गरेको प्रदेश ट्रमा सेण्टरका लागि दाङको लमहीमा डिभिजन बन कार्यालयको नाममा रहेको जग्गा ट्रमा सेण्टरको नाममा स्वामित्व हस्तान्तरणका लागि संघीय सरकारलाई सिफारिस गर्ने समेत मन्त्रिपरिषदले निर्णय गरेको शर्माले बताए ।

पत्रकारहरुको प्रश्नको जवाफ दिँदै मन्त्री शर्माले मिडीया विधेयक यथास्थितीमा रहेको जनाउँदै सकेसम्म संशोधन गरेर संसदमा लैजाने पक्षमा आफु रहेको स्पष्ट पारे । उनले हाल सो विधेयक संशोधन पनि नभएको र फिर्ता पनि नभएको बताउँदै सरकारले सबै पक्षसँग परामर्श जारी राखेको बताए ।

यसमा तपाइको मत

Your email address will not be published. Required fields are marked *


*