काठमाडौं । आज नेकपा माओवादी केन्द्रले देशका ७५३ पालिकाहरुमा एकैपटक पालिका सम्मेलन गर्दैछ । सत्ता गठबन्धनको प्रमुख दल काँग्रेस र प्रमुख विपक्षी दल एमालेले महाधिवेशनमा जुटिरहेका बेला माओवादी केन्द्र पनि आफ्नो राष्ट्रिय सम्मेलनको पूर्व तयारीमा जुटेको हो ।
अघिल्लो हप्ता वडा अधिवेशन सकेको माओवादीले आज पालिका अधिवेशन सम्पन्न गर्ने जनाएको छ । माओवादी केन्द्रले नेकपा विभाजनपछि पहिलो पटक राष्ट्रिय सम्मेलनको तयारी गरेको छ । पालिका अधिवेशन सहित माओवादीले सम्पर्क समन्वय समिति र विशेष समितिको पालिकास्तरीय सम्मेलन पनि सम्पन्न हुने माओवादीले जनाएको छ ।
पालिका सम्मेलनको माओवादी अध्यक्ष ‘प्रचण्डले आज अपराह्न १ बजे ‘भर्चुअल’ माध्यमबाट उदघाटन सहित सम्बोधन गर्ने कार्यक्रम तय भएको छ ।
पालिका सम्मेलनबाट पालिका स्तरिय कमिटी सहित सम्मेलनबाट प्रदेश सम्मेलनका लागि प्रतिनिधिसमेत चयन हुने माओवादीको केन्द्रीय निर्वाचन आयोगका प्रमुख विष्णुपुकार श्रेष्ठले जानकारी दिए । माओवादी केन्द्रले देशैभर २५ मंसिरमा प्रदेश सम्मेलन गर्ने कार्यक्रम तय गरेको छ ।
माओवादीले ११–१३ पुसमा काठमाडौंमा राष्ट्रिय सम्मेलन आयोजना गर्दैछ । फुटेर गएका माओवादी घटकहरुसँग एकताको प्रयासमा जुटेको माओवादीको एकता भएको अवस्थामा राष्ट्रिय सम्मेलनलाई एकता महाधिवेशन समेत हुन सक्ने माओवादीका एक नेताले बताए ।
प्रतिक्रिया