राष्ट्रियसभा निर्वाचन : आज उम्मेदवारी फिर्ता लिने समय

काठमाडौं । राष्ट्रिय सभा सदस्य निर्वाचनमा मनोनयनपत्र दर्ता गरेका उम्मेदवारलाई आज नाम फिर्ता लिने समय तोकिएको छ ।

निर्वाचन आयोगले शनिबार बिहान १० देखि अपराह्न ४ बजेसम्म नाम फिर्ता लिने समय तोकेको हो । आयोगले मनोनयनपत्र जाँचबुझ गरी शुक्रबार उम्मेदवारको नामावली प्रकाशन गरेको थियो ।

उम्मेदवारले सम्बन्धित प्रदेशको निर्वाचन अधिकृतको कार्यालयमार्फत् उम्मेदवारी फिर्ता लिन सक्नेछन् । यसपछि आयोगले आइतबार अन्तिम नामावली सार्वजनिक गर्नेछ । त्यस्तै, आइतबार नै उम्मेदवारलाई चुनाव चिह्न पनि प्रदान गर्ने कार्यतालिका रहेको छ ।

राष्ट्रिय सभाको निर्वाचन माघ १२ गते हुन लागेको छ । यसमा १९ पदका लागि ९ राजनीतिक दलका ४३ जनाले उम्मेदवारी दिएका छन् ।

सत्तारुढ पाँच राजनीतिक दलले मिलेर उम्मेदवारी दिएका छन् । नेकपा (एमाले) ले १९ वटै सीटमा उम्मेदवार उठाएको छ ।