विराटनगर । भारतीय सीमा सुरक्षा बल एसएसबीले दशगजा क्षेत्रमा अन्तराष्ट्रिय सीमा मिचेर बनाएको सुरक्षा पोष्ट सशस्त्र प्रहरीले हटाइदिएको छ ।
नेपाल–भारत सीमा क्षेत्रअन्तर्गत विराटनगर महानगरपालिका–१६ दरैया र भारत जोगवनीको टिकुलिया बस्तीबीचको दसगजामा एसएसबीले सुरक्षा पोष्ट बनाएको थियो । त्यहाँ २४सै घण्टा हतियार सहितका एसएसबी तैनाथ थिए । नेपालमा त्यसको निकै विरोध भएको थियो ।
जिल्ला सुरक्षा समिति मोरङको बैठकमा पनि दशजगा अतिक्रमणबारे कुरा उठेको थियो। त्यसपछि सशस्त्र प्रहरीले सो पोष्ट हटाउन पहल गरेको थियो । सशस्त्रलाई मोरङका प्रमुख जिल्ला अधिकारी काशीराज दाहाल र सशस्त्रका उच्च अधिकारीले एसएसबीले बनाएको पोस्ट् हटाउन निर्देशन दिएका थिए । सीमा सुरक्षामा खटिएको सशस्त्रले भारतीय एसएसबीका अधिकारीसँग दशगजाबाट पोष्ट हटाउन बारम्बार आग्रह गरेपछि एसएसबी पछि हटेको हो । लगभग एकमहिना अघि पोष्ट बनाएको एसएसबीले अहिले भारतीय भूमिभित्रै पोष्ट लैजान सहमत भएको छ ।
दुई देशीय सिमानाको दसगजामा कुनै पनि भौतिक संरचना निर्माण गर्न पाईँदैन ।
प्रतिक्रिया