काठमाडौं । सत्तारुढ गठबन्धनको बैठक सुरू भएको छ । प्रधानमन्त्री निवास बालुवाटारमा बैठक सुरु भएको हो ।
स्थानीय निर्वाचनबारे छलफल गर्न आज (शनिबार) बिहान पनि गठबन्धनको बैठक बसेको थियो । तर उक्त बैठक कुनै निष्कर्षमा नपुगी अपराह्न पुनः बस्नेगरी टुंगिएको थियो ।
स्थानीय निर्वाचनबारे गठबन्धनभित्रका दलहरूबीच रहेको मतभेद हटाई साझा धारणा बनाउन भन्दै आज बिहान बसेको बैठक आवश्यक तयारी गरेर फेरि बैठक बस्नेगरी टुंगिएको थियो ।
बिहानको बैठक निष्कर्षमा पुग्न नसकेपछि अपराह्नका निम्ति पुनः निर्धारण गरिएको बैठकमा राष्ट्रिय जनमोर्चाका प्रतिनिधिबाहेक चारवटै राजनीतिक पार्टीका शीर्षनेताहरूको उपस्थिति छ ।
आजको दोस्रो बैठक बस्नुअघि सत्तारुढ गठबन्धनले कानुनविद्हरुसँग परामर्श गरेको जनाइएको छ । अहिलेको बैठकले स्थानीय निर्वाचनबारे गठबन्धनभित्रका दलहरूबीच साझा धारणा तय गर्ने बताइएको छ ।
गठबन्धनले यसअघि पनि कानुनविद्हरूसँग परामर्श गरेको थियो । त्यसबेला विज्ञहरुले संविधान र ऐनमा स्थानीय निर्वाचनसम्बन्धी व्यवस्था बाझिएको भन्दै संविधानबमोजिम ऐन संशोधन गरेर अघि बढ्नुपर्ने सुझाव दिएका थिए ।
निर्वाचन आयोगले भने वैशाखमा निर्वाचन गर्न मिति प्रस्ताव गरिसकेको छ ।
प्रतिक्रिया