प्रधानमन्त्री देउवासँग प्रचण्डले गरे एमसीसी सम्झौता संशोधनको प्रस्ताव

काठमाढौं । एमसीसी अनुमोदन नगरे सत्ता गठबन्धननै टुट्न सक्ने चर्चा चलिरहेकै बेला माओवादी केन्द्रका अध्यक्ष प्रचण्डले प्रधानमन्त्री शेरबहादुर देउवा समक्ष एमसीसी सम्झौता संशोधनको प्रस्ताव राखेका छन् । सत्ता साझेदार दलका तीन शीर्ष नेताहरुबीच प्रधानमन्त्री निवास बालुवाटारमा भएको भेटवार्तामा प्रचण्डले एमसीसी सम्झौता संशोधनको प्रस्ताव गरेका हुन् ।

प्रधानमन्त्री शेरबहादुर देउवा, माओवादी केन्द्रका अध्यक्ष प्रचण्ड र नेकपा (समाजवादी)का अध्यक्ष माधवकुमार नेपालबीच छलफल भएको हो ।

नेताहरुको भेटवार्तामा प्रचण्डले एमसीसीका केही बुँदा संशोधन गर्नुपर्ने प्रस्ताव गरेको बालुवाटार स्रोतले दाबी गरेको छ । प्रचण्डले एमसीसीका केही बुँदा संशोधन नगरि पारित गर्न नहुने भन्दै संशोधन गरेर मात्र पारित गर्नु पर्ने प्रस्ताव गरेको स्रोतले उल्लेख गरेको छ ।

एमसीसी पारितका लागि सदनमा दर्ता भएपनि हालसम्म टेबुल गरिएको छैन । अब बस्ने बैठकमा एमसीसीलाई टेबुल गर्ने बताइएका प्रतिनिधिसभा सभामुख अग्नी सापकोटाले बैठक सार्दे समेत गइरहेका छन् । गठबन्धन दलकै शीर्ष नेताहरूबीच एमसीसीबारे फरक फरक धारणा सार्वजनिक हुँदै आएको छ ।