संसदीय दल बैठकमा ओलीले भने – हामी आवेश र उत्तेजनामा निर्णय गर्दैनौँ

काठमाडौं । प्रमुख प्रतिपक्षी दल एमाले अध्यक्ष केपी ओलीले चार न्यायाधीशका बारेमा आवेश र उत्तेजनामा निर्णय नगर्ने बताएका छन् ।

सोमबार बसेको पार्टीको संसदीय दलको बैठकलाई सम्बोधन गर्दै उनले दोस्रो पटक विघटन गरिएको प्रतिनिधिसभा पुनर्स्थापना गर्न आदेश दिने चार न्यायाधीशका बारेमा आवेग र उत्तेजनामा निर्णय नलिने बताएका हुन् ।

कांग्रेस, माओवादी केन्द्र र नेकपा (एकीकृत समाजवादी)का सांसदले प्रधानन्यायाधी चोलेन्द्र शमशेर जबराविरुद्ध महाअभियोग प्रस्ताव दर्ता गरेपछि काउन्टरमा एमालेले पनि चार न्यायाधीशविरुद्ध महाअभियोग प्रस्ताव ल्याउने भनिएका बेला ओलीले सो बताएका हुन् ।

बैठकमा विभिन्न सांसदले जबरा र एमसीसीका बारेमा धारणा राखेका थिए । सोही क्रममा बैठकमा सांसदद्वय घनश्याम भुसाल र भीम रावलले चोलेन्द्रलाई नबोक्न पार्टी नेतृत्वलाई सुझाव दिएका थिए । उनीहरुले अरु न्यायाधीसमाथिको महाअभियोगबारे सोचेरमात्र कदम चाल्नुपर्ने बताएका थिए । सांसद भीम रावलले एमसीसीको विरोध गर्न माग गरेका छन् ।

एमाले संसदीय दलको बैठक सकिएको छ ।