काठमाडौं । सभामुख अग्निप्रसाद सापकोटाले एमसीसीको विषयमा आफु रेफ्री मात्रै भएको बताएका छन् ।
आफुले बोलाएको सर्वदलीय बैठकपछि बोल्दै सभामुख सापकोटाले एमसीसीको विषयमा दलहरुकै भूमिका निर्णायक हुने स्पष्ट पारेका हुन् । बैठकमा नेताहरुबीच एमसीसी र संसद्को अवरोध खुलाउने विषयमा छलफल भएको थियो । सापकोटाले दलहरुबीच सहमति भए आफूले एमसीसी अघि बढ्नबाट नरोक्ने स्पष्ट पारे । उनले भने, ‘एमसीसीका सम्बन्धमा म अम्पायरमात्रै हो । दलहरू सहमत भए म रोक्दिन ।’
सापकोटाले राष्ट्रिय महत्वका विषयमा सबै राजनीतिक दलहरूबीच सहमति हुनु राम्रो हुने बताए । बैठकमा आफुले राष्ट्रिय महत्वका विषयमा राष्ट्रिय सहमतिका लागि पहल गर्न नेताहरुलाई भूमिका खेल्न आग्रह गरेको बताए । सापकोटाले भने, ‘राष्ट्रिय महत्वका विषयमा आम सहमति बन्दा धेरै राम्रो कुरा हुन्छ । सहमति गर्नका लागि सबैले पहल र प्रयत्न गर्ने कुरा भएको छ ।’
सभामुख सापकोटाले सर्वदलीय बैठक विशेष भएको बताए । उनले संसद्को अवरोध हटाउने विषयमा प्रतिपक्षलाई समेत सहमतमा ल्याउन नेताहरूले पहल गर्ने विश्वास व्यक्त गरे । ‘राजनीतिक दलका नेताहरूले प्रतिपक्ष दललाई सहमतिमा ल्याउनु हुन्छ र शीर्ष नेताहरूले संसद् सुचारु गर्न लागि पहल गर्नुहुनेछ भन्ने मैले विश्वास लिएको छु’सापकोटाले बताए ।
सापकोटाले आफु अहिलेको अवस्थामा सभामुखको हैसियतमा रहेकाले स्वतन्त्र, निष्पक्ष ढंगले निर्णय गर्ने जनाए ।
प्रधानमन्त्री शेरबहादुर देउवासहित संसदमा सहभागी एमाले बाहेकका दलका शीर्ष नेता सम्मिलित सर्वदलीय बैठक झण्डै चार घण्टा चलेको थियो । एमालेले भने सभामुखले बोलाएको बैठक बहिस्कार गरेको थियो ।
प्रतिक्रिया