काठमाडौं । एमीसी विवादका कारण सत्ता गठबन्धको भविष्य संकटमा परेको बेलामा नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधवकुमार नेपालबीच छलफल भएको छ ।
सत्ता गठबन्धनको निर्णायक बैठक बस्नुअघि गठबन्धनमा आवद्ध दुई शीर्ष कम्युनिष्ट नेताबीच भेटवार्ता भएको हो । साँझ ५ बजे सत्ता गठबन्धनको बैठक बस्दैछ ।
सिंहदरबारस्थित माओवादी संसदीय दलको कार्यालयमा प्रचण्ड र नेपालबीच छलफल भएको हो । दुई नेताहरुको छलफलकैबीच जनता समाजवादी पार्टीका नेता राजेन्द्र श्रेष्ठ पनि सहभागी भएका थिए ।
छलफलपछि संचारकर्मीहरुसँग संक्षिप्त कुरा गर्दै माओवादी अध्यक्ष प्रचण्डले आफुहरुको जोड गठबन्धन जोगाउनमै रहेको बताए । ‘गठबन्धनलाई नै कसरी बचाउने र यो एमसीसीलाई कसरी निकास दिने भन्नेमै छ । पाँच दलको बैठकमा छलफल गरेर एउटा निचोड निकाल्नेमै हाम्रो जोड छ’, प्रचण्डले भने, जोड सकेसम्म यो गठबन्धन बचाउनेमा छ ।’
एकीकृत समाजवादीका अध्यक्ष नेपाललले भने धेरै कुरा बिग्रिँदै गएको बताए ।
माओवादी र एकीकृत समाजवादीले दलहरुबीच सहमति नभै संसदमा एमसीसी टेबल गर्न नहुने अडान राखिरहेका छन् । माओवादीले त जबरजस्ती संसदमा पेश गरिए सरकार छोड्नेसम्मको निर्णय गरेको छ ।
एमसीसीकै विषयमा आजै बिहान प्रचण्ड र प्रधानमन्त्री शेरबहादुर देउवाबीच पनि भेटवार्ता भएको थियो ।
प्रतिक्रिया