काठमाडौं । भारतले वेस्ट इन्डिजविरुद्धको तीन खेलको टी-ट्वान्टी सिरिज एक खेल अगावै आफ्नो कब्जामा पारेको छ । कोलकत्तामा गएराति भएको दोस्रो खेलमा वेस्ट इन्डिजलाई ८ रनले हराउँदै भारतले सिरिज जितेको हो ।
भारतले दिएको १ सय ८७ रनको लक्ष्य पछ्याएको वेस्ट इन्डिजले २० ओभरमा ३ विकेट गुमाएर १ सय ७८ रन मात्र बनाउन सकेको थियो ।
वेस्ट इन्डिजका रोभम्यान पावेलले अविजित रहँदै ६८ रनको अर्धशतकीय इनिङ्स खेलेपनि टोलीलाई जित दिलाउन सकेनन् । त्यस्तै निकोलस पुरनले ६२ रनको अर्धशतकीय इनिङ्स खेले । ब्राण्डन किङ २२ तथा केली मेयर्स ९ रनमा आउट भए ।
भारतका युजभेन्द्र चाहल, भुवनेश्वर कुमार र रबी बिस्नोईले १-१ विकेट लिए । त्यसअघि पहिले ब्याटिङ गरेको भारतले २० ओभरमा ५ विकेट गुमाएर १ सय ८६ रन जोडेको थियो ।
भारतका लागि ऋषव पन्तले अविजित रहदै ५२ रनको अर्धशतकीय इनिङ्स खेले । विराट कोहलीले पनि ५२ रनको अर्धशतकीय इनिङ्स खेल्दा भेन्कातेस आयरले ३३ रन जोडे ।
कप्तान रोहित शर्माले १९ रन जोड्दा आउट भए । वेस्ट इन्डिजका रोस्टन चेसले ३ विकेट लिए । यो जितसँगै भारतले ३ खेलको सिरिजमा २-० को अग्रता बनाएको छ ।
प्रतिक्रिया