काठमाडौं । नेपाल आईसीसी टी-२० विश्वकप छनोटको ग्लोबल छनोटअन्तर्गत समूह चरणको अन्तिम खेलमा क्यानडालाई हराउँदै सेमिफाइनमा पुगेको छ ।
कुशल भुर्तेल र दीपन्द्रसिंह ऐरीले तेस्रो विकेटका लागि ५८ रनको साझेदारी गर्नुका साथै सन्दीप लामिछानेको तीन विकेटप्रेरित नेपालले सोमबार आईसीसी टी-२० विश्वकपको ग्लोबल क्वालिफायर ‘ए’मा क्यानडालाई ८ विकेटले हराएर सेमिफाइनलमा स्थान पक्का गरेको हो ।
सोमबार मस्कटको अल अमारतस्थित ओमान क्रिकेट एकेडेमीको मैदानमा क्यानडाका कप्तान नवनित धालिवालले टस जितेर ब्याटिङ गर्ने निर्णय गरेका थिए । क्यानडाले १५ ओभरमा सबै विकेट गुमाएर ८० रन बनाएको थियो । ८१ रनको लक्ष्य नेपालले १४.१ ओभरमा दुई विकेट गुमाएर पूरा गरेको हो ।
समूहको अन्तिम खेल विजय हासिल गरेसँगै नेपाल समूह ‘बी’को विजेता बन्दै सेमिफाइनलमा स्थान पक्का गरेको हो । नेपालले अब फाइनल प्रवेशका लागि युनाइटेड अरब इमिरेट्स (युएई)विरुद्ध खेल्नेछ । युएई सोमबारै समूहको अन्तिम खेलमा बहराइनसँग पराजित भए पनि रनरेटका आधरमा सेमिफाइनल पुग्न सफल भएको हो । समूह ‘ए’बाट आयरल्यान्डले विजेता बन्दै सेमिफाइनलमा स्थान बनाएको छ । आयरल्यान्डले फाइनल प्रवेशका लागि ओमानविरुद्ध खेल्नेछ । ओमानले आजै सम्पन्न अर्को खेलमा फिलिपिन्सलाई ९ विकेटले पराजित गरेको थियो ।
मंगलबार हुने सेमिफाइनलमा युएईलाई पराजित गरेमा नेपालले अष्ट्रेलियामा हुने आईसीसी टी-२० विश्वकपमा स्थान बनाउने छ । विश्वकप १६ अक्टोबरदेखी १३ नोभेम्बरसम्म हुनेछ । ग्लोबल क्वालिफायर ‘ए’बाट फाइनल खेल्ने दुई र जिम्बाब्वेमा हुने ग्लोबल क्वालिफायर ‘बी’बाट फाइनल खेल्ने दुई टोलीले विश्वकपमा स्थान बनाउनेछन् ।
८१ रनको लक्ष्य पूरा गर्नेक्रममा नेपालका कुशलले अविजित ३४ र दीपेन्द्रसिंहले अविजित २७ रन बनाए । दुई ब्याट्सम्यानले तेस्रो विकेटका लागि ५८ रनको अविजित साझेदारी गरे । आसिफ शेखले १७ रन बनाए । कुशल मल्ल शून्यमा पवेलियन फर्किए । क्यानडाका कलीम सना र सलमान नजरले एक एक विकेट लिए ।
त्यसअघि नेपालका कप्तान सन्दीप लामिछानेले चार ओभरमा १२ रन दिएर तीन विकेट लिए । कमलसिंह ऐरी र अभिनाष बोहराले दुई विकेट लिए । कुशल मल्लले एक विकेट लिए । क्यानडाका कप्तान नवनितले १८, रायन पठानले १४, सलमान नजरले १० र डिलन हेलिगरले अविजित २४ रन बनाउनुबाहेक अन्यले दोहोरो अंकमा रन बनाउन सकेनन् ।
पहिलो ६ ओभर सकिँदा नेपालले चार विकेट लिएको थियो । ‘पावर प्ले’ सकिँदा क्यानडा ३९÷४ को स्थितिमा छ । नेपालका कमलसिंहले दुई र अभिनाषले एक विकेट लिएका थिए । कमलसिंहले पहिलो ओभरको पाँचौं बलमा म्याथ्यु स्पूर्स शून्यमा पवेलियन फर्काएका थिए । कमलसिंहले पाँचौं ओभरको तेस्रो बलमा नवनित(१८¬)लाई लोकेश बमको हातबाट क्याच गरे ।
ओपनर रायन पठान छैटौं ओभरको दोस्रो बलमा रन आउट भए । सोही ओभरको अन्तिम बलमा एक रन बनाएका रविन्दरपल सिंहलाई अभिनाषले विकेटकिपर आसिफ शेखमार्फत क्याच गरे । सातौं ओभरको अन्तिम बलमा सन्दीप लामिछानेले एक रन बनाएका हम्जा तारिकलाई बोल्ड गरे । लगत्तै साद विन जफर दुई रन बनाएर रन आउट भए ।
नवौं ओभरको अन्तिम बलमा कलीम सानालाई सन्दीपले कुशल मल्लमार्फत क्याच गरे । दशौं ओभरको पहिलो बलमा कुशलले हर्ष ठकर(२)लाई एलबीडब्यू आउट गरे । ११औं ओभरको पहिलो बलमा सन्दीपले जुनैद सिद्धिकी(२)लाई विकेटकिपर आसिफमार्फत क्यच गरे ।
नेपालले आज फिलिपिन्सविरुद्धको टिममा एक खेलाडी परिवर्तन गरेको थियो । गुल्शन झाको स्थानमो कमलसिंह ऐरी टिममा फर्किएका थिए ।
नेपालले पहिलो खेलमा ओमानलाई ३९ रन र दोस्रो खेलमा फिलिपिन्सलाई १३६ रनले हराएको थियो । क्यानडाले फिलिपिन्सलाई ११८ रनले हराएको थियो भने ओमानसँग ९ विकेटले पराजित भएको थियो ।
प्रतिक्रिया