काठमाडौं । पेट्रोलियम व्यवसायीहरूले आन्दोलन फिर्ता लिएका छन् । नेपाल आयल निगमसँगको वार्तामा जेठ १५ गते सम्म व्यवसायीले उठाएका सबै मागलाई सम्बोधन गर्ने निगमको आश्वासन पछि व्यवसायीहरूले आन्दोलनका सबै कार्यक्रमहरु फिर्ता लिएका हुन् । व्यवसायीहरुले भोलि चैत २० गतेदेखि देशव्यापी आन्दोलनको घोषणा गरेका थिए ।
निगम व्यवस्थापन र पेट्रोलियम व्यवसाय संस्थागत समन्वय समितिका पदाधिकारीहरू बीच भएको वार्ता तथा छलफलमा पेट्रोलियम विक्रेता कमिशन सम्बन्धी र एल.पी. ग्यासको ढुवानी भाडा समायोजन सम्बन्धी मागको सम्बन्धमा ७ दिन भित्र सम्बोधन हुने तथा अन्य पेट्रोलियम कारोबारसँग सम्बन्धित मागको सम्बन्धमा जेष्ठ १५ सम्ममा निष्कर्ष सहितकोआवश्यक कार्य गर्ने सहमति भएपछि आन्दोलनका कार्यक्रम फिर्ता गरिएको व्यवसायी र निगमको तर्फबाट आज प्रकाशित संयुक्त विज्ञप्तिमा जनाइएको छ ।
यसअघि, पेट्रोलियम ढुवानी व्यवसायी, पम्प व्यवसायी र खाना पकाउने एलपी ग्यास उत्पादक व्यवसायीहरूले संयुक्त संगठन बनाएर देशभर पेट्रोलियम पदार्थको ढुवानी तथा बिक्री वितरण ठप्प पार्ने घोषणा गरेका थिए । उनीहरूले विश्वव्यापीरूपमा पेट्रोलियम पदार्थको मूल्य बढेको तर निगमले आफूहरूको ढुवानी भाडा नबढाएको भन्दै आन्दोलनका चरणबद्ध कार्यक्रम सार्वजनिक गरेका थिए ।
निगमलाई ढुवानी भाडा बढाउन दबाब दिँदै व्यवसायीहरू आन्दोलनमा उत्रिएसँगै शुक्रबारबाटै देशभरीका पेट्रोल पम्पहरूमा लाइन लाग्न सुरु भइसकेको थियो ।
आईतबार बिहान ८ बजेदेखि पेट्रोलियम पदार्थको बिक्री वितरण सुरु हुने व्यवसायीहरुले बताएका छन् ।
प्रतिक्रिया