बुटवल । २ दिन देखि परेको अविरल वर्षाका कारण खसेको पहिरोले लुम्बिनी प्रदेशका दर्जनौं स्थानमा सडक अवरुद्ध भएको छ । पानीपर्ने क्रम जारी रहेकाले अवरुद्ध भएका सडक खुलाउन असहज भएको लुम्बिनी प्रदेश ट्राफिक प्रहरी कार्यालय बुटवलले जनाएको छ ।
ट्राफिक प्रहरीका अनुसार सिद्धार्थ राजमार्गको तिनाउ गाँउपालिका-३ ड्याम साईड नजिकै लेदो सहितको पहिरो खस्दा बिहान ५ बजेदेखि बुटवल-पाल्पा सडक खण्ड अवरुद्ध छ भने सिद्धार्थ राजमार्गकै बगनाशकाली गाँउपालिका ५ पाल्पामा पहिरो खस्दा पाल्पा-पोखरा खण्ड पनि अवरुद्ध भएको छ ।
त्यसैगरि गुल्मीको रुरुक्षेत्रको रातमाटामा पहिरो खस्दा रिडी-तम्घास सडक अवरुद्ध छ भने रिडी-बुर्तिबाङ सडकको सत्यवती गाँउपालिका जहरे खोलामा पहिरो खस्दा सडक अवरुद्ध भएको छ ।
पश्चिम दाङको घोराही १७ बगालेमा पहिरो खसेर दाङ-रोल्पा सडक अवरुद्ध छ भने प्युठान सरुमारानी गाँउपालिका बड्डाँडामा पहिरो खस्दा भालुवाङ-रोल्पा सडक पनि अवरुद्ध रहेको छ । रुकुम सिस्ने ५ रानीबोटमा र रुकुमकै भुमे गाँउपालिकामा पर्ने मध्यपहाडी राजमार्ग समेत अवरुद्ध रहेको प्रहरीले जनाएको छ ।
वर्षा जारी रहेकाले अत्यावश्यक बाहेक यात्रा नगर्न र मौसमको जानकारी लिएर मात्र यात्रा तय गर्न ट्राफिक प्रहरी लुम्बिनी प्रदेश ट्राफिक प्रहरी कार्यालयका प्रवक्ता डीएसपी मोहनबहादुर खाँणले आग्रह गरेका छन् ।
प्रतिक्रिया