काठमाडौं । करको दर हेरफेर विवाद र सीसीटीभी फुटेज विवादमा परेका अर्थमन्त्री जनार्दन शर्माले संसदमा आफ्ना कुरा राख्ने भएका छन् ।
आज बस्ने प्रतिनिधिसभा बैठकमा अर्थमन्त्री शर्माले आफ्ना कुरा राख्ने भएका हुन् । प्रधानमन्त्री शेरबहादुर देउवा र माओवादी अध्यक्ष पुष्पकमल दाहाल प्रचण्डबीच हिजो भएको भेटघाट पछि अर्थमन्त्री शर्मालाई आज आफ्ना धारणा राख्न लगाउने सहमति भएको थियो ।
शर्मामाथि प्रमुख प्रतिपक्षी दल नेकपा एमाले र सत्तारुढ दलकै कतिपय नेताहरुले समेत छानविन गर्नुपर्ने माग गरेपछि शर्माले संसदमा आफ्नो सफाइ राख्न लागेका हुन् । अर्थमन्त्री शर्माले सम्बोधनका क्रममा आफुले कुनै गल्ती नगरेको भन्दै वास्तविकता छानविनका लागि सघाउने बताउन लागेको स्रोतले बताएको छ ।
प्रचण्ड निवास खुमलटारमा केहीबेर अघि सम्पन्न पूर्वस्थायी समिति सदस्यहरुको बैठकमा अर्थमन्त्री शर्माले सीसीटीभी फुटेल डिलिट काण्डमा आफु संलग्न नभएको स्पष्टीकरण दिएका थिए । शर्माले आफुले ल्याएको जनपक्षीय बजेटबाट आत्तिएका विपक्षीहरुले बद्नाम गर्न सीसीटीभी फुटेजको सहारा लिएपनि वास्तवितकता त्यस्तो नभएको दलिल पेश गरेका थिए ।
प्रतिक्रिया