भाडामा सवारी बोक्ने रातो प्लेटका सवारी साधनमाथि प्रहरीको एक्सन

बुटवल । रुपन्देहीको सालझण्डी प्रहरीले भाडामा सवारी बोक्ने रातो नम्बर प्लेट राखिएका निजी सवारी साधन विरुद्ध कारवाही थालेको छ । निजी प्रयोजनमा दर्ता भएका (रातो नम्बरप्लेट) पिकअपमा यात्रु चढाई प्रयोजन बिपरित कार्य गर्ने सवारीलाई प्रहरीले कारवाही थालेको हो ।

निजि सवारीहरुले यात्रु राखि सालझण्डी-झिमझिमे-पाल्पा-अर्घाखाँची रुटमा संचालन भईरहेका ६ वटा सवारी साधन नियन्त्रणमा लिई जरिवाना असुलेर छाडिएको छ । प्रहरी र ट्राफिक प्रहरीको ३ घण्टाको चेकजाँचका क्रममा ६ वटा निजी सवारीले भाडामा सवारी बोकी बिभिन्न स्थानमा जाँदै गरेको अवस्थामा प्रहरीले ति सवारी साधनलाई प्रहरीले नियन्त्रणमा लिएको थियो ।

नियन्त्रणमा रहेका सवारी साधनकालाई थप कारवाहीको लागि यातायात ब्यवस्था कार्यालय, बुटबल पठाईएकोमा ४ ओटा सवारी साधनलाई प्रति सवारी साधन १० हजार का दरले र थप दुईवटा सवारीसाधन कालो नम्बर प्लेटमा दर्ताको प्रकृयामा गएका तर नम्बर प्लेट नराखि चलाएकोले २ हजारका दरले जरिवाना असुल गरि कारवाही गरिएको प्रहरी निरिक्षक जगन्नाथ मरासिनीले बताए ।