काठमाडौं । साफ यू-२० च्याम्पियनसिप फुटबलको समूह चरणको तेस्रो खेलमा नेपालले भारतसँग लज्जास्पद हार व्यहोरेको छ ।
भुवनेश्वरस्थित कालिंगा स्टेडियममा आइतबार साँझ सम्पन्न खेलमा आयोजक भारतले नेपाललाई ८-० गोल अन्तरले पराजित गरेको हो ।
भारतलाई जित दिलाउन पार्थिव सुन्दर गोगोइले दुई गोल गरे । यता, टाइसन सिंह, हिमान्सु जान्ग्रा, टन्कधर बाग, मोहमद सुहिब, सुभो पाउलले १/१ गोल गरे ।
खेलको ३२औं मिनेटमा टाइसन सिंहले गोल गर्दै भारतलाई सुरुआती अग्रता दिलाएका थिए । नेपालका गोलरक्षक इश्वर गुरुङको गल्तीको फाइदा उठाउँदै उनले हातबाट फुस्किएको बललाई हेडरमार्फत् गोलमा परिणत गरे ।
पहिलो हाफ १ गोलले अगाडि रहेको भारतले दोस्रो हाफमा थप ७ गोल थप्यो । ५१ औं मिनेटमा पार्थिवसुन्दर गोगोइले गोल गर्दै भारतको अग्रता दोब्बर बनाए । उनले पेनाल्टी क्षेत्रभित्रबाट गरेको शक्तिशाली प्रहार गोल भएको थियो ।
त्यसको दुई मिनेट पछि अर्थात् ५२ औं मिनेटमा पार्थिवले व्यक्तिगत दोस्रो गोल गर्दै भारतको अग्रता ३-० को बनाए । थ्रु पासमा अफसाइड बिट गर्दै गरेको चिप प्रहारमा गोलमा परिणत भयो ।
६२ अौं मिनेटमा गिमानाले गोल गर्दै भारतलाई ४-० ले अघि बढाए । ७१ अौं मिनेटमा भारतले पेनाल्टी पायो। उक्त पेनाल्टीलाई झाङ्ग्राले गोल गर्दै स्कोर ५-० पुर्याए ।
७८अौं मिनेटमा मोहम्मदले गोल गर्दै भारतलाई ६ गोलले अघि बढाए । ८९ अौं मिनेटमा गोल सिंहले गर्दै ७-० को फराकिलो अग्रता दिलाए। इन्जुरी समयमा गोल गर्दै पउलले भारतलाई ८-० को जित दिलाए ।
यस हारसँगै नेपाल अंक तालिकाको तेस्रो स्थानमा झरेको छ । बंगलादेश ३ खेलमा ९ अंकका साथ शीर्ष स्थानमा छ । नेपाल र भारतको समान ३ खेलमा ६ अंक भएपनि हेड टु हेडमा भारत अघि छ । १-१ अंक जोडेका माल्दिभ्स र श्रीलंका प्रतियोगिताबाट बाहिरिसकेका छन् ।
प्रतिक्रिया