तयारी नपुगेको भन्दै माओवादी केन्द्रको स्थायी कमिटी बैठक सर्‍यो

काठमाडौं । नेकपा माओवादी केन्द्रको स्थायी समिति बैठक सारिएको छ । आज बिहीबार बिहान ९ बजेदेखि बस्ने तय भएको बैठक तयारी नपुगेको भन्दै दिउँसो ४ बजेका लागि सारिएको हो ।

पार्टी केन्द्रीय कार्यालय पेरिसडाँडामा आज बस्ने स्थायी समिति बैठकले माओवादीको पदाधिकारी टुंगो लगाउने बताइएको छ । अध्यक्ष पुष्पकमल दाहाल ‘प्रचण्ड’ले पदाधिकारी प्रस्ताव गर्ने बताइएको छ ।

माओवादीको आठौं महाधिवेशन सकिएको सात महिना पूरा भइसक्दा पनि अहिलेसम्म पदाधिकारी, स्थायी समिति चुनिन सकेको छैन भने पोलिटब्यूरो र केन्द्रीय समितिले पूर्णता पाउन सकेको छैन ।

बुधबार बसेको स्थायी समिति बैठकले पदाधिकारी र स्थायी समितिका सदस्य बिहीबार टुंग्याउने निर्णय गरेको थियो । स्राेतका अनुसार आजको बैठकमा प्रचण्डले नेता देव गुरुङलाई महासचिव बनाउने तयारी गरेका छन् ।