प्रतिनिधिसभा बैठक जारी, नागरिकता विधेयक आजै पारित हुँदै

काठमाडौं । राष्ट्रपति विद्यादेवी भण्डारीले संसदमा फिर्ता पठाएको नागरिकता विधेयक आजै पारित हुने भएको छ ।

कार्यव्यवस्था परामर्श समितिको बैठकमा विधेयकका विषयमा छलफल भएपनि कुनै सहमति हुन सकेन । यद्यपी, आजै पारित गर्नेगरी संसद सचिवालयले कार्यसूची बनाएको छ । प्रतिनिधिसभाको बैठक अहिले बसिरहेको छ ।

बैठकमा सत्तारुढ दलका प्रतिनिधिले तत्काल पारित गर्नुपर्ने र फेरि राष्ट्रपतिकहाँ प्रमाणीकरणका लागि पठाउनुपर्ने धारणा राखेका थिए । प्रमुख प्रतिपक्ष एमालेले भने थप छलफल गरी संशोधन गर्नुपर्ने माग गरेको थियो । एमालेले विधेयकका विषयमा छलफल गर्न सर्वदलीय बैठकको माग समेत गरेको थियो ।

सहमति नभएपछि सभामुख सापकोटा र उपसभामुख पुष्पा भुसालले कानुनअनुसार अगाडि बढ्ने बताएका थिए ।