नेपालगन्ज । नेपालगन्जमा छाडा पशु चौपायको समस्या समाधानका लागि पहल अघि बढाइएको छ । नेपालगन्ज उपमहानगरपालिकाले बिहिवार सर्वपक्षीय बैठक आयोजना गरि छाडा पशु चौपायको दीर्घकालिन र अल्पकालिन समाधानका लागि योजना अघि बढाएको हो ।
बैठकको निर्णय अनुसार यहि भदौं महिनाभित्र पशु चौपाया (गाई, गोरु, गधा, खच्चड, घोडा, बंगुर) सडकमा छाडा नछोडन आग्रह सहित माईकिङ सहितको प्रचारात्मक कार्यक्रम चलाइने भएको छ । भदौं मसान्तपछि पशु चौपाया छाडा छोडनेलाई कारवाही गर्ने र यसरी छोडिएका पशु चौपायलाई राख्नका लागि अस्थायी संरचना बनाएर ब्यवस्थापन गरिने नगर प्रमुख प्रशान्त विष्टले बताए । छाडा पशुु चौपायका कारण नगरको ट्राफिक ब्यवस्थापनमा असहजता भएको र दुर्घटना पनि बढेको भन्दै नगर प्रमुख विष्टले सडकमा छाडा छोडिएका पशु चौपायलाई अन्यत्र राखेर अल्पकालिन ब्यवस्थापनमा तत्काल जुटेको जानकारी दिए ।
प्रमुख जिल्ला अधिकारी सुर्यबहादुर खत्रीले सीमा पारीबाट छाडा पशु चौपाय आउन नदिनका लागि सीमा कडाई गर्न सुरक्षा निकायलाई निर्देशन दिइने बताए । ट्राफिक ब्यवस्थापन र नगरको सौन्दर्यताका लागि छाडा पशु चौपायको ब्यवस्थापन आवश्यक भएको उनको भनाई छ ।
जिल्ला प्रहरी कार्यालय बाँकेका प्रमुख एसपी श्यामकृष्ण अधिकारीले छाडा पशु चौपायको ब्यवस्थापनका लागि अन्तर पालिका समन्वय गरी सबैको सहकार्य र समन्वय आवश्यक भएको बताए ।
नेपालगंजमा छाडा छोडिएका मध्ये गाईगोरुलाई नियन्त्रणमा लिएर कांजीहाउसमा राखेपनि लिन कोही नआउने कांजीहाउसका कर्मचारीको भनाई छ । गधा, खच्चड र घोडा भने जरिबाना तिरेर पनि चौपायाधनीले लैजाने गरेको कर्मचारीहरुले बताए ।
प्रतिक्रिया