सत्ता गठबन्धनको बैठकमा जसपा अनुपस्थित

काठमाडौं । सिट बाँडफाँटबारे छलफल गर्न सत्ता गठबन्धनको बैठक बसिरहेको छ ।

प्रधानमन्त्री निवास बालुवाटारमा बसिरहेको बैठकमा गठबन्धनको एक दल जनता समाजवादी पार्टी जसपा भने अनुपस्थित भएको छ ।

कांग्रेस र माओवादी केन्द्रले सिट बाँडफाँटमा अपमान गरेको आरोप लगाउँदै समानान्तर ढंगले एमालेसँग सघन सम्वाद गरिररहेको जसपा बैठकमा अनुपस्थित भएको हो ।

जसरी पनि सत्ता गठबन्धनमा पहिरो ल्याउने योजनामा रहेको एमालेले जसपालाई २२ सिट दिएर भएपनि सहमति गर्ने प्रयासको नजिक पुगेको बताइएको छ । यादवले गठबन्धनमा कम्तिमा २५ सिट पाउनुपर्ने दाबी गरिरहेका थिए ।

बालुवाटामा जारी बैठकमा प्रतिनिधिसभा र प्रदेशसभा निर्वाचनका लागि सिट बाँडफाँटको अन्तिम कसरत भैरहेको छ ।

पर्सि अर्थात असोज २३ गते प्रत्यक्ष तर्फको मनोनयन दर्ताको कार्यतालिका रहेको छ । यसअघि गठबन्धनमा सहमति जुटाएर दलहरुले आआफ्नो पार्टीभित्रबाट उम्मेदवारको छनौट गर्नुपर्ने बाध्यता रहेको छ ।