काठमाडौँ । नेकपा एमालेका अध्यक्ष केपी शर्मा ओलीले समानुपातिकतर्फको मतगणनाको परिणामको मुचुल्काको प्रति सिधै आफ्नो फेसबुकको म्यासेजमा पठाउन गणनामा रहेका एमाले प्रतिनिधिलाई निर्देशन गरेका छन् ।
अध्यक्ष ओलीले शनिबार साँझ सामाजिक सन्जालमार्फत् समानुपातिकको मतगणनामा चनाखो बन्न कार्यकर्तालाई निर्देशन दिँदै गणनाको मुचुल्काको प्रति आफ्नो म्यासेज बक्समा पठाउन निर्देशन दिएका हुन् ।
‘समानुपातिक मतगणना भइरहेको छ। सुरु देखिको मतगणनालाई नियाल्दा पछिल्लो समयमा केही पार्टीको मत वृद्धि अस्वाभाविक देखिन्छ। एउटा पार्टीलाई आएको केही मत ३ प्रतिशत नकट्ने गठबन्धनमा रहेको अर्को पार्टीमा जोड्ने जस्ता ग़लत कार्य पनि हुनसक्छ,’ ओलीले सामाजिक सञ्जालमा लेखेका छन्,’जिल्ला(जिल्लामा मतगणनामा रहनु भएका साथीहरू चनाखो रहनुहोस् । मतगणनामा प्रतिनिधि रहनु भएका साथीहरूलाई म त्यहाँको मत परिणामको मुचुल्काको प्रति मेरो फेसबुकको म्यासेज बक्समा पठाउनु हुन अनुरोध गर्दछु।’
एमाले समानुपातिकतर्फ पहिलो दल बनेको छ । प्रत्यक्षतर्फ भने एमालेको ३९ सिटमा जित घोषणा भइसकेको छ । जारी मतगणनाको क्रममा तीन स्थानमा एमाले अग्रस्थान छ ।
प्रतिक्रिया