काठमाडौं । नेकपा माओवादी केन्द्रबाट पहिलो चरणमा नारायणकाजी श्रेष्ठ उपप्रधानमन्त्रीसहित मन्त्री बन्ने भएका छन् ।
माओवादी केन्द्रको आज बिहान बसेको पदाधिकारी बैठकले श्रेष्ठलाई उपप्रधानमन्त्री सहित मन्त्री बनाउने निर्णय गरेको हो । केही दिनअघि मात्र राष्ट्रिय सभामा दलको नेतामा चयन भएका श्रेष्ठ मन्त्री बन्न लागेको माओवादी सचिव दीनानाथ शर्माले बताए । तर उनी कुन मन्त्री बन्दैछन् भन्नेबारे अहिल्यै टुंगो लागेको छैन ।
अन्य मन्त्रीहरुको बारेमा भने सत्ता सहयात्री अन्य दलहरुसँग छलफल गरेपछि मात्र टुंगो लाग्ने बताइएको छ । अहिले ११ बजे सत्ता सहयात्री दलहरुको संयुक्त बैठक बस्दैछ । आज पाँच दलबाट एक एक जना मन्त्रीले सपथ लिएर मन्त्रिपरिषद् गठन हुने नेता शर्माले जानकारी दिए ।
पदाधिकारी बैठकमा अध्यक्ष पुष्पकमल दाहाल प्रचण्डले अहिलेको विकसिर राजनीतिक घटनाक्रमबारे ब्रिफिङ गरेका थिए ।
प्रधानमन्त्री प्रचण्डसहितका मन्त्रीहरुले आज साँझ ४ बजे राष्ट्रपति कार्यालय शीतल निवासमा सपथ ग्रहण गर्नेछन् ।
प्रतिक्रिया