बुटवल । लुम्बिनी प्रदेशका मुख्यमन्त्री लिला गिरीले आज विश्वासको मत लिँदै छन । पुस २७ गते प्रदेशसभाका १० मध्ये ७ दलका ५६ जना र २ स्वतन्त्र गरी ५८ सांसदको समर्थनमा मुख्यमन्त्री बनेका गिरीले आज बस्ने प्रदेशसभाको बैठकमा विश्वासको मत लिन लागेका हुन ।
पुस २८ गते गिरीले प्रदेशको राजधानी देउखुरीमा पद तथा गोपनियताको शपथ ग्रहण गर्दै दुई सदस्य विना विभागीय मन्त्रिपरिषद गठन गरेका थिए ।
मुख्यमन्त्री गिरीले प्रदेशसभाबाट विश्वासको मत लिनेबारे प्रदेशसभा सचिवालयलाई जानकारीपत्र बुझाएको प्रदेश सभाका सचिव दुर्लभकुमार पुनले जानकारी दिए ।
संविधानको धारा १६८ को उपधारा ४ अनुसार मुख्यमन्त्री नियुक्त भएको ३० दिनभित्र विश्वासको मत लिनुपर्ने संवैधानिक व्यवस्था छ ।
गिरीलाई नेकपा एमालेका २९, माओवादी केन्द्रका १०, राष्ट्रिय प्रजातन्त्र पार्टीका ४, नागरिक उन्मुक्ति पार्टीका ४, जसपाका ३, जनमत पार्टीका ३ जना, लोकतान्त्रिक समाजवादी पार्टीका ३ जना र स्वतन्त्र २ जनाको समर्थन छ ।
मुख्यमन्त्री गिरीले विश्वासको मत लिएपछि मन्त्रीपरिषद विस्तारमा लाग्ने ७ दलीय गठबन्धनको नेतृत्व गरेको नेकपा एमालेले बताएको छ । मुख्यमन्त्री सहित ९ सदस्यीय मन्त्रिमण्डल गठन गर्ने तयारी सरकारले गरेको छ ।
प्रतिक्रिया