बुटवल । रुपन्देहीको तिलोत्तमामा आजदेखी आठौं मणिमुकुन्द रनिङ्गकप अन्तर जिल्ला पुरुष भलिबल प्रतियोगिता सुरु हुदैं छ । मणिमुकुन्द भलिबल क्लब तिलोत्तमाको आयोजनामा आजदेखी प्रतियोगिता सुरु हुने भएको हो ।
बिहान १० बजेदेखी सुरु हुने प्रतियोगिमा पहिलो खेल जिल्ला भलिबल संघ नवलपुर र जिल्ला भलिबल संघ म्यादी हुने खेल संयोजक सुरेन्द्र गुरुङले बताए । कार्यक्रमको औपचारिक उदघाटन भने दिउँसो २ हुने गुरुङले बताए ।
विभिन्न प्रदेशका ९ समूह सहभागी हुने प्रतियोगिताको विजेताले १ लाख ५० हजार नगद राशीसहित कप मेडल र प्रमाणपत्र प्राप्त गर्ने छ । यसैगरी द्वितीय र तृतीय हुने समुहले क्रमशः १ लाख र ५५ हजार नगद राशीसहित कप मेडल र प्रमाणपत्र प्राप्त गर्ने क्लबका अध्यक्ष लोकेन्द्र भण्डारीले बताए । यसैगरी सेमिफाइनल प्रवेश गर्ने अन्तिम समुहले ३० हजार नगद राशी सान्त्वना पुरस्कार प्राप्त गर्ने उनले बताए । विधागततर्फ बेस्ट सेटर, बेस्ट प्लेयर, बेस्ट स्पाइकर, बेस्ट डिफेन्डर, बेस्ट ब्लकर लगायतलाई जनही १० पुरस्कार राशीले सम्मान गरिने भएको छ ।
करिब २५ लाख रुपैयाँ खर्च हुने अनुमान गरिएको छ । प्रतियोगितामा खेलाडीहरुका लागि खाना, नास्ता, आवास तथा यातायातको समेत व्यवस्था गरिएको आयोजकले जनाएको छ ।
प्रतियोगितामा राष्ट्रिय तथा अन्तर्राष्ट्रियसँगै नयाँ खेलाडीहरु समेत सहभागी हुने छन् । प्रतियोगिताले नयाँ प्रतिभाहरुको उदय तथा पहिचानमा सहयोग गर्नुका साथै खेल गतिविधिलाई चलायमान बनाउने आयोजकले अपेक्षा गरेको छ । “स्वास्थ्यका लागि खेलकूद राष्ट्रका लागि खेलकुद”- भन्ने मूल नाराका साथ खेल गतिविधि गर्दै आएको मणिमुकुन्दले विगतदेखि भलिबल प्रशिण सञ्चालन गर्दै खेलाडीहरु उत्पादन गर्ने गरेको छ ।
आठौं संस्करणको प्रतियोगितामा गण्डकी प्रदेशबाट जिल्ला भलिबल संघ स्याङ्जा, बाग्लुङ, याग्दी, नवलपुर र पर्वत सहभागी हुने भएका छन् । यसैगरी लुम्बिनी प्रदेशका नवलपरासी, रूपन्देही, पाल्पा, गुल्मी सहभागी हुने भएका छन् ।
प्रतिक्रिया