काठमाडौं । पाकिस्तानले ‘अखण्ड भारत’को दाबी संशोधनवादी र विस्तारवादी मानसिकताको उपज भएको टिप्पणी गरेको छ ।
भारतको संसदमा राखिएको भित्ते चित्र (मुरल)मा राखिएको अखण्ड भारतभित्र पाकिस्तानलाई समावेश गरिएको भन्दै त्यहाँको विदेश मन्त्रालयले आपत्ति जनाउँदै त्यस्तो टिप्पणी गरेको हो ।
पाकिस्तान विदेश मन्त्रालयले आज एक विज्ञप्ति जारी गर्दै प्राचिन भारतलाई चित्रण गरिएको बहानामा पाकिस्तान र अन्य क्षेत्रीय देशहरुलाई समेत समावेश गरेकोमा असन्तुष्टि जनाएको छ ।
विदेशमन्त्रालयले जारी गरेको विज्ञप्तिमा मुरललाई अखण्ड भारतको नामसँग जोडेर भारतका केन्द्रीय मन्त्रीहरु र भाजपाका नेताहरुले गरेको विश्लेषणबाट आफुहरु आश्चर्यचकित भएको जनाइएको छ ।
अखण्ड भारतको दाबीले भारतका छिमेकी राष्ट्रहरूको मात्र होइन आफ्नै धार्मिक अल्पसंख्यकहरूको पहिचान र संस्कृतिलाई पनि नियन्त्रण गर्न खोजेको पाकिस्तानले जनाएको छ । आफ्नो विभाजनकारी र संकुचित राजनीतिक एजेन्डालाई अगाडि बढाउन अन्य देशहरू विरुद्ध बयानबाजी नगर्न भन्दै पाकिस्तानले भारतलाई सुझाव पनि दिएको छ ।
‘विस्तारवादी महत्वाकांक्षालाई पोषित गर्नुको सट्टा भारतले आफ्ना छिमेकीहरूसँगको विवाद सुल्झाउनुपर्छ र शान्तिपूर्ण र समृद्ध दक्षिण एसिया निर्माण गर्न उनीहरूसँग मिलेर काम गर्नुपर्छ”, विदेश मन्त्रालयको विज्ञप्तिमा उल्लेख गरिएको छ ।
मुरलमा नेपालको लुम्बिनी, कपिलवस्तु र विराटनगरलाई समावेश गरेको विषयमा नेपालभित्र विरोध भैरहेको छ ।
प्रतिक्रिया