सिद्धबाबा सुरुङमार्गको प्रवेशबिन्दुमा पहिरो, मुलद्वार भत्कियो

बुटवल । सिद्धबाबा सुरुङ मार्गको सिद्धबाबा तर्फको मुल प्रवेशद्धार पहिरोले भत्काइदिएको छ । सोमबारबाट परेको वर्षासँगै आएको पहिरोले सुरुङमार्गको मुख्य प्रवेश द्वार भत्केको हो ।

सुरुङमार्गको मुख्य प्रवेशबिन्दुमा माथिबाट पहिरो खसेपछि भत्किएको स्थानीय जनप्रतिनिधि तोया लम्सालले जानकारी दिए । पहिरोका कारण सुरुङमार्गमा क्षति पुगेको परियोजनाका इन्जिजियर युधिस्थिर पन्थीले बताए । कुन भागमा कतिको क्षति भएको भन्ने विषयमा भने उनले केही बताएनन् । चाइना स्टेट कन्स्ट्रक्सन इन्जिनियरिङ कर्पोरेसनले ७ अर्ब ३४ करोड २१ लाख रुपैयाँमा सुरुङमार्गको काम अगाडि बढाएको थियो ।

मध्यवर्षामा नेपाली प्राविधिकरुले ढलान गर्न नहुने सुझाव विपरित परियोजनाले ४ दिन पहिले मात्र प्रवेश देवारको ढलान गरेको बताइएको छ ।

सुरुङमार्गको दोभान खण्डको प्रवेश द्वारपनि पहिरोले पुरेको छ । पहिरोले मुख्य द्वार पुरेपनि त्यस तर्फ नभत्केको लम्सालले बताए । परियोजनाले पहिरो पन्छाउने काम सुरु गरिसकेको छ ।

एक हजार एक सय २६ मिटर दूरी रहेको सुरुङमार्गको काम तिब्रगतिमा अगाडि बढीरहेका बेला पहिरोले मुख्यबिन्दुमा क्षति पुगेको छ ।