नेपालगन्ज । नेकपा एमाले बाँकेमा जिल्ला नेतृत्वले नविकरण नगरि अलपत्र पारिएका एक हजार बढी एमालेका संगठित सदस्यहरुको सदस्यता लुम्बिनी प्रदेश कमिटीले सिधै नविकरण गरिदिएको छ । एमाले बाँकेका जिल्ला अध्यक्ष किस्मतकुमार कक्षपतिले नविकरण हुन नदिई रोकिएका संगठित सदस्यहरुको सदस्यता प्रदेश कमिटीबाट नविकरण भएको हो ।
नेकपा एमाले लुम्विनी प्रदेश कमिटीको बिहिवार दाङमा बसेको बैठकले बाँकेको बैजनाथ गाउँपालिका कमिटीका ८ सय बढी संगठित सदस्यसहित जिल्लाभरका एक हजार सातसय बढि संगठित सदस्यहरुको सदस्यता नविकरण गरिएको प्रदेश कमिटी सदस्य घननाथ खनालले जानकारी दिए ।
सदस्यता नविकरणको रसिद प्राप्त गरेर पनि पार्टीले ताकेको समयसीमा भित्रै जिल्ला पार्टी कार्यालयमा बुझाएको भएपनि अध्यक्ष कक्षपतिले नविकरण गर्न अस्वीकार गरेपछि पार्टीको बैजनाथ गाउँपालिका कमिटीले जिल्ला पार्टी कार्यालयमा तालाबन्दी समेत गरेको थियो ।
पार्टी केन्द्रीय सदस्य सुर्य ढकाल सहितका बाँकेबाट प्रतिनिधित्व गर्ने केन्द्रीय सदस्यहरु शान्ति ढकाल, दीपा शर्मा, पशुपति दयाल मिश्र र मोहम्मद हारुनले पार्टी संगठित सदस्यता कायम हुने भन्दै लिखित जिम्मेवारी लिएपछि तालाबन्दी खुलेको थियो । केन्द्रीय सदस्य ढकालले संगठित सदस्यहरुको नविकरण गराउन नसके राजिनामा दिने प्रतिवद्धता समेत ब्यक्त गरेका थिए ।
प्रतिक्रिया