काठमाडौं । प्रधानमन्त्री पुष्पकमल दाहाल प्रचण्डले बोलाएको राष्ट्रिय मान्यताप्राप्त राजनीतिक दलका शीर्ष नेताको बैठक बसिरहेको छ ।
बैठक प्रधानमन्त्री कार्यालय सिंहदरबारमा बसिरहेको छ । बैठकमा सबै राजनीतिक दलका शीर्ष नेता उपस्थित भएपनि प्रमुख प्रतिपक्षी नेकपा एमालेका अध्यक्ष केपी शर्मा ओली भने अनुपस्थित भएका छन् ।
एमालेबाट पटकपटक हुँदै आएको संसद अवरोध खुलाउने विषयमा बोलाइएको बैठकमा एमालेकै अध्यक्ष अनुपस्थित हुनु अर्थपूर्ण मानिएको छ ।
त्रिभुवन अन्तराष्ट्रिय विमानस्थल भन्सार कार्यालयबाट बाहिरिएको सुन प्रकरणमा उच्चस्तरीय छानबिन समिति बनाउनुपर्ने माग राख्दै एमालेले संसद अवरोध गर्दै आएको छ ।
बैठकमा प्रधानमन्त्री प्रचण्ड, कांग्रेस सभापति शेरबहादुर देउवा, राष्ट्रिय स्वतन्त्र पार्टीका सभापति रवि लामिछाने, राप्रपाका अध्यक्ष राजेन्द्र लिङ्देन, जनमतकी अनितादेवी साह सहभागी छन् ।
एमालेबाट भने संसदीय दलका उपनेता सुवास नेम्वाङ सहभागी भएका छन् ।
प्रतिक्रिया