पोखरा । नेकपा एमालेको जारी प्रदेश अधिवेशनमा अध्यक्ष केपी ओली निकट तेस्रो उम्मेदवारको पनि पराजय भएको छ । बिहिबार सम्पन्न गण्डकी प्रदेश प्रथम अधिवेशनबाट ओली निर्देशनमा महासचिव शंकर पोखरेल पक्षका मानिएका उम्मेदवारलाई हराउँदै अध्यक्षमा म्याग्दीका नवराज शर्मा निर्वाचित भएका छन् ।
अध्यक्षका अर्का प्रत्यासी लमजुङका मायानाथ अधिकारीलाई पराजित गरेका हुन् । नवराजले ५ सय ३१ प्राप्त गर्दा अधिकारीले ३ सय ६५ मत मात्र प्राप्त गरे ।
नवराजलाई एमाले उपमहासचिव पृथ्वीसुब्बा गुरुङले साथ दिएका थिए भने मायानाथलाई जिताउन महासचिव शंकर पोखरेल देखि स्थायी कमिटी सदस्य खगराज अधिकारी सक्रियरुपमा लागेका थिए ।
उपाध्यक्षमा नवराज प्यानलकै स्याङ्जाका मिनप्रसाद गुरुङ विजयी भएका छन् । गुरुङले ५ सय ३४ र उनका प्रत्यासी नवलपुरका बाबुराम विश्वकर्माले ३ सय ६२ मत प्राप्त गरे ।
सचिवमा लमजुङका धननजय दवाडीले ५ सय २० मत लिएर विजयी भए । सचिवका अर्का उम्मेदवार कास्कीका रश्मि आचार्यले ३ सय ६७ मत प्राप्त गरे ।
उपसचिवमा कास्कीका दामबहादुर विकले ४ सय ९९ मत लिएर निर्वाचित हुँदा उनका प्रत्यासी म्याग्दीका सन्तोष रावलले ३ सय ९७ मत ल्याए । उपसचिव महिलातर्फ पर्वतकी मन्जु अधिकारीले ५ सय ३१ मत लिएर विजयी हुँदा कास्कीकी मिना गुरुङले ३ सय ६५ मत ल्याइन् ।
बिहिवार भएको मतदानमा ८ सय ९६ मत खसेको थियो । ३३ वटा विद्युतिय मेसिनमार्फत मतदान भएको थियो ।
यस अघि लुम्बिनी र कर्णालीमा पनि अध्यक्ष ओलीको आशिर्वाद पाएका उम्मेदवारको पराजय भएको थियो ।
प्रतिक्रिया