काठमाडौं । विद्युतीय चुरोट (भेप)मा लुकाई सुन तस्करी गरेको प्रकरणमा राहुल महरासहित चारजनामाथि साढे सात वर्षको कैद सजायँ माग गर्दै मुद्दा दायर भएको छ ।
नेपाल प्रहरीको केन्द्रीय अनुसन्धान व्यूरो (सीआईबी)ले गरेको अनुसन्धानको आधारमा जिल्ला सरकारी वकिलको कार्यालयले काठमाडौं जिल्ला अदालतमा महरासहित चार जना विरुद्ध मुद्दा दर्ता गरेको हो ।
पूर्वसभामुख कृष्णबहादुर महराका कान्छाछोरा राहुल बाहेक मुद्दा दर्ता गरिएका अन्य तीन जनामा लोकेन्द्रकुमार पौडेल, बेल्जियन नागरिक दावा छिरिङ र निमा छिरिङ रहेका छन् । तीन जना प्रहरीको नियन्त्रणमा रहेपनि निमा छिरिङ भने फरार छन् ।
प्रहरीले रेशम महरा भनिने राहुल महरा लगायतका व्यक्तिहरुलाई भन्सार ऐन, २०६४ को दफा ५७ अनुसारको कसुरमा ३ देखि ५ वर्षसम्मको कैद माग गरेको छ । यसैगरी संगठित अपराधको कसुरमा त्यसको ५० प्रतिशत गरी अधिकतम साढे ७ वर्षको कैद सजायको मागदावी गरेको छ ।
यसैगरी बेल्जियन नागरिक दाओजिन वाङलाई भने आपराधिक विश्वासघात, भन्सार ऐन र संगठित अपराधमा मुद्दा चलाएको छ ।
भेपमार्फत सुन तस्करी प्रकरणमा ८ करोड रुपैयाँभन्दा बढीको बिगो कायम गरिएको छ ।
प्रतिक्रिया