पहिचानवादी र दुर्गा प्रसाईंका कार्यकर्ताद्वारा झापामा महेश बस्नेतको गाडी तोडफोड

काठमाडौं । झापाको अर्जुनधारामा एमाले नेताकार्यकर्ताको गाडी तोडफोड भएको छ । एमाले नेता महेश बस्नेत सहभागी कार्यक्रममा उपस्थित भएकाहरूको गाडी फोडफोड भएको हो ।

नेता बस्नेत सहभागी एक कार्यक्रम बिथोल्न गएका पहिचानवादी पक्षधर र दुर्गा प्रसाईंका कार्यकर्ता तोडफोडमा उत्रिएका हुन् ।

एमाले नेताकार्यकर्ताले पार्किङमा राखेका सवारी साधन तोडफोड गरिएको छ । तोडफोडबाट सात वटा गाडीमा क्षति पुगेको छ । तोडफोडमा संलग्नहरुको खोजी भइरहेको प्रहरीले जनाएको छ ।

सोमबार काठमाडौंको कान्तिपथमा आफूमाथि कालोमोसोसहित आक्रमण भएपछि व्यवसायी दुर्गा प्रसाईंले एमाले अध्यक्ष केपी शर्मा ओलीको निर्देशनमा युवा संघका कार्यकर्ताले घटना घटाएको दाबी गरेका थिए ।

उक्त घटना पछि प्रसाईंले भनेका थिए, ‘हजुरबा केपी ओली र कमरेड महेश बस्नेत लगायत सम्पूर्ण एमाले तथा राष्ट्रिय युवा संघलाई धन्यवाद छ । तपाईंहरुले दिनुभएको पैँचो नेपाली जनताले छिट्टै फिर्ता गर्नेछ ।’