बुटवल । भैरहवाको सिद्धार्थ कोल्ड स्टोरमा बरामद भएको फूलको मालाको रुपन्देही प्रहरीले छानवीन सुरु गरेको छ । ठूलो परिमाणमा फेला परेको मालाको स्वामित्व लिन आह्वान गरे अनुसार मालाको स्वामित्व लिन केही ब्यक्तिहरु आउने क्रम सुरु भएको प्रहरीले जनाएको छ ।
प्रहरीले प्रमाण सहित माला दाबी गर्न बोलाएको जनाउँदै प्रमाण नपुगेका माला जफत गरिने रुपन्देही प्रहरी प्रवक्ता मनोहर भट्टले बताए । कोल्ड स्टोरमा १ लाख पिस माला भण्डारण गरिएको स्रोतको दाबी छ । करोड बढीको फूलको माला बुधबार राती भन्सार छलेर नेपाल भित्राइएको र त्यती नै परिमाणको माला नेपाल भित्राउन सिमापारि तयारी अवस्थामा राखिएको स्रोतले जनाएको छ ।
माला भण्डारण गरिएको क्षेत्रलाई प्रहरीले शील गरेको छ । माला बरामद नगर्न लुम्बिनी प्रदेशकै एक मन्त्रीले प्रहरीलाई दवाव दिएको जनाउँदै सो मालामा मन्त्रीको समेत लगानी हुन सक्ने स्रोतको भनाई छ । स्रोतका अनुसार मालाका तस्करहरुले रातारात नेपालका नर्सरीहरुबाट माला खरिद गरेको बिल बनाएका छन् । बिल उपलब्ध गराउनेमा रुपन्देहीकै केही नर्सरी र फूल ब्यवसायीको संलग्नता रहेको बताइएको छ ।
राज्यले नेपाली किसानहरुले उत्पादन गरेको फूलमालालाई प्रोत्साहन गर्न प्लास्टिकको मालामा प्रतिबन्ध र माला आयातमा कडाई गरेको बताएपनि अबैध बाटोबाट त्यस्ता कार्यहरु भइरहेका छन् । नेपाली किसानले उत्पादन गर्दा लागेको लागत भन्दा चोरी पैठारी गरेको माला सस्तोमा बिक्रि गरिएपछि नेपाली फूल किसानको लगानी डुब्ने अवस्था देखिएको छ ।
लक्ष्मीदास मानन्धरको नाममा रहेको सो कोल्डस्टोरमा कस्ले माला भण्डारण गरेको हो भन्ने विषय प्रहरीले खुलाएको छैन ।
प्रतिक्रिया