काठमाडौं । नेपाल प्रिमियर लिग (एनपीएल) क्रिकेटमा आज पनि दुई खेल हुँदैछन् ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा शुक्रबार दिउँसो साढे १२ बजे हुने पहिलो खेलमा कर्णाली याक्स र सुदूरपश्चिम रोयल्सबीच प्रतिस्पर्धा हुनेछ ।
तीन खेल खेलेको कर्णाली याक्स अंक तालिकाको तेस्रो स्थानमा छ । उसले तीनमध्ये दुई खेलमा जित र एक खेलमा हार बेहोरेको छ । पहिलो खेलमा काठमाडौं गोर्खाजसँग पराजित भएको कर्णालीले दोस्रो खेलमा विराटनगर किङ्स र तेस्रो खेलमा जनकपुर बोल्ट्सलाई हराउँदै लगातार दुई जित निकालेको थियो ।
सुदूरपश्चिम रोयल्स भने अंक तालिकाको छैटौं स्थानमा छ । चार खेल खेलेको उसले दुईमा जित र दुईमा हार बेहोरेको छ । पहिलो खेलमा चितवन राइनोजलाई हराउँदै प्रतियोगितामा जितको खाता खोलेको सुदूरपश्चिम दोस्रो खेलमा विराटनगर किङ्ससँग पराजित भएको थियो । तेस्रो खेलमा पोखरा एभेन्जर्सलाई हराएको सुदूरपश्चिम चौथो खेलमा लुम्बिनी लायन्ससँग पराजित भएको थियो ।
आज दिउँसो साढे ४ बजे हुने दोस्रो खेलमा चितवन राइनोज र पोखरा एभेन्जर्स आमनेसामने हुनेछन् ।
तीन खेल खेलेको चितवन अंक तालिकाको सातौं स्थानमा छ। उसले एक खेलमा जित र एक खेलमा हार बेहोरेको छ भने वर्षाका कारण एक खेल रद्द हुँदा अंक बाँडेको छ । पहिलो खेलमा सुदूरपश्चिमसँग पराजित भएको चितवनको लुम्बिनी लायन्ससँगको दोस्रो खेल वर्षाका कारण रद्द भएको थियो । तेस्रो खेलमा भने चितवनले विराटनगर किङ्सलाई हराउँदै पहिलो जित निकालेको थियो ।
पोखरा एभेन्जर्स भने अंक तालिकाको पुछारमा छ । तीन खेल खेलेको पोखराले तीनै खेलमा हार बेहोरेको छ । पहिलो खेलमा लुम्बिनी लायन्स, दोस्रो खेलमा जनकपुर बोल्ट्स र तेस्रो खेलमा सुदूरपश्चिम रोयल्ससँग पराजित भएको पोखरा आज पहिलो जित निकाल्ने लक्ष्यमा हुनेछ ।
प्रतिक्रिया