काठमाडौं । माइतीघर मण्डलादेखि नयाँ वानेश्वर क्षेत्रमा एक महिना सभा जुलुस गर्न काठमाडौं जिल्ला प्रशासनले रोक लगाएको भोलिपल्ट ललितपुरका विभिन्न क्षेत्रमा ६ महिनासम्म निषेधित क्षेत्र तोकिएको छ ।
जिल्ला प्रशासन कार्यालय ललितपुरले मंगलबार आदेश जारी गर्दै पुल्चोकस्थित मन्त्री निवास र युएन हाउस क्षेत्रको सुरक्षा संवेदनशीलताका लागि भन्दै निषेधित क्षेत्र तोकेको हो ।
ललितपुरका प्रमुख जिल्ला अधिकारी रूद्रप्रसाद पण्डितले जारी गरेको आदेशमा भनिएको छ, ‘मंसिर ५ गतेदेखि आगामी ६ महिनासम्मका लागि पाँच जनाभन्दा बढी व्यक्ति भेला भई नाराजुलुस, प्रदर्शन, धर्ना, घेराउ, अनशन, सभाजस्ता आन्दोलन वा विरोधका कार्यक्रम गर्न निषेध गरेको आदेश जारी गरिएको छ ।’
मंसिर ७ गते दुर्गा प्रसाईंका समर्थक र एमाले निकट युवा संघले एकै स्थानलाई लक्षित गर्दै प्रदर्शनको तयारी गरेपछि जिल्ला प्रशासन कार्यालय काठमाडौंले सोमबार माइतीघर–नयाँ बानेश्वर क्षेत्र एक महिनाका लागि निषेधित क्षेत्र तोकेको थियो।
प्रतिक्रिया