राष्ट्रियसभा सदस्य निर्वाचन : आज उम्मेदवारहरुको नामावली प्रकाशन हुने

काठमाडौं । राष्ट्रियसभा सदस्य निर्वाचनका लागि मनोनयपत्र दर्ता गराएका उम्मेदवारहरुको नामावली आज (बिहीबार) सार्वजनिक हुने भएको छ । निर्वाचन आयोगले निर्धारण गरेको कार्यतालिकाअनुसार बिहीबार उम्मेदरहरुको नामावली प्रकाशन गरिन लागिएको हो ।

उम्मेदवारी दिएकाहरुको मनोनयपत्रमाथि बुधबार जाँचबुझ भएको थियो । बुधबार नै उम्मेदवारविरुद्ध परेका उजुरी उपर जाँचबुझ गरी निर्णय गरिएको निर्वाचन आयोगले जनाएको छ ।

राष्ट्रियसभा सदस्य निर्वाचनका लागि निर्वाचन आयोगले सोमबार उम्मेदवारहरुको मनोनयन दर्ता गरेको थियो । यस्तै, मनोनयन दर्ता गरेका उम्मेदवारविरुद्ध मंगलबार उजुरी आह्वान गरेको थियो । बुधबार हरेक उम्मेदवारको मनोनयनपत्रका साथै सो उपर कुनै उजुरी परे नपरेको जाँचबुझ गरिएको थियो ।

मनोनयपत्र दर्ता भएका उम्मेदवारको मननोयनपत्र तथा उजुरी उपर जाँचबुझ भएपछि बिहीबार नामावली प्रकाशन गरिने भएको हो । त्यसपछि आयोगले उम्मेदवारहरुलाई नाम फिर्ताको समय दिनेछ ।

राष्ट्रियसभा सदस्य निर्वाचनका लागि आयोगको निर्धारण गरेको कार्यतालिकाअनुसार शुक्रबार उम्मेदवारले नाम फिर्ता लिन सक्नेछन् । यस्तै, शुक्रबार नै उम्मेदवारको अन्तिम नामावली प्रकाशन गरिनेछ ।

राष्ट्रियसभा सदस्य निर्वाचनका लागि सोमबार उम्मेदवारहरुले मनोनयन दर्ता गरेका थिए । राष्ट्रिय सभाका १९ जना सदस्यका लागि माघ ११ गते हुने निर्वाचनका लागि सोमबार ७ प्रदेशबाट ५२ जनाले उम्मेदवारी दिएका थिए ।

राष्ट्रियसभा सदस्य पदका लागि कोशी प्रदेशमा २ सिटका लागि ५ जना, मधेस प्रदेशका २ सिटका लागि ५ जना र बागमती प्रदेशमा ४ सिटका लागि १५ जनाले उम्मेदवारी दिएका छन् । यस्तै, गण्डकी प्रदेशमा ३ सिटका लागि ८ जना, लुम्बिनी प्रदेशमा २ सिटका लागि ७ जना, कर्णाली प्रदेशमा ३ सिटका लागि ६ जना र सुदूरपश्चिम प्रदेशमा ३ सिटका लागि ६ जनाले उम्मेदवारी दिएका छन् ।

आगामी फागुन २० गतेदेखि राष्ट्रियसभाका १ तिहाई (२० जना) सदस्य (सांसद)को पदावधि सकिँदैछ । पदावधि सकिनुभन्दा ३५ दिन अगाडि नै निर्वाचन हुनुपर्ने कानुनी व्यवस्थाअनुसार माघ ११ गते निर्वाचन हुन लागेको हो ।

पदावधि सकिन लागेका २० मध्ये राष्ट्रपतिबाट मनोनित हुने एउटा सिट बाहेक अन्य १९ सिटका लागि निर्वाचन हुन लागेको हो । निर्वाचनका लागि सात प्रदेशमा १-१ मतदानस्थल र २-२ वटा मतदान केन्द्र कायम गरिएको छ ।