नेपालगन्ज । एमालेका महासचिव शंकर पोखरेलले मुलुकको विकास र समृद्धिका लागि बलियो राष्ट्रिय शक्तिको आवश्यकता रहेको बताएका छन् । प्रेस चौतारी, बाँकेले नेपालगन्जमा आयोजना गरेको पत्रकार सम्मेलनमा बोल्दै महासचिव पोखरेलले अहिलेको सत्ता गठबन्धनबाट मुलुकको विकास र समृद्धि हुन नसक्ने बताए ।
महासचिव पोखरेलले सत्तामा जाने विषयमा एमालेले नसोचेको बताउदै अहिले पार्टी संगठन बलियो बनाउन लागि परेको बताए । एमालेले मध्यपहाडी क्षेत्रमा गरेको समृद्धिका लागि संकल्प यात्राले त्यस क्षेत्रका जनतामा रहेको निराशालाई हटाउने काम गरेको बताउदै उनले अब हुलाकी क्षेत्रमा पनि त्यस किसिमको यात्रा गर्ने जानकारी दिए ।
महासचिव पोखरेलले एमाले कम्युनिष्ट पार्टीहरुसँग एकतातिर नलागेर सही विचार बोक्नेका बीचमा धु्रवीकरण गर्न लागि परेको बताए ।
फरक प्रसंगमा सरकारले बेतिथिहरु समाधान नगर्दा जनतामा निराशा छाएको पोखरेलको भनाई थियो । उनले बालुवाटार जग्गा, नक्कली भुटानी शरणार्थी, सुनकाण्ड कोट्याउदा सत्ताकै अनुहार देखिएपछि सरकारले फाइल बन्द गरेको आरोप लगाए ।
प्रेस चौतारी नेपाल, बाँकेका अध्यक्ष दुर्गा रोकायको अध्यक्षतामा भएको कार्यक्रममा पोलिटब्यूरो सदस्य खेममान खड्का, केन्द्रीय सदस्यहरु पशुपतिदयाल मिश्र, मो. हारुनलगायतको उपस्थिति रहेको थियो ।
प्रतिक्रिया