काठमाडौं । नेपाली कांग्रेसका सभापति शेरबहादुर देउवाले एकीकृत समाजवादीका अध्यक्ष माधवकुमार नेपाललाई सहकार्य गरेर अघि बढ्न प्रस्ताव गरेका छन् ।
अध्यक्ष नेपाल भेट्न पत्नी आरजु र मुख्य सचेतक रमेश लेखकसहित कोटेश्वर पुगेका देउवाले नेपालसँग विकसित घटनाक्रममा मिलेर अघि बढ्न प्रस्ताव गरेका हुन् ।
जवाफमा नेपालले आफ्नो पार्टीको सचिवालय बैठक आजै बस्न लागेको जानकारी गराउँदै सोही बैठकमा प्रस्तावबारे छलफल गर्ने बताएका छन् ।
प्रधानमन्त्री प्रचण्डले कांग्रेससँगको गठबन्धन तोडेर एमालेसहितको नयाँ गठबन्धन बनाएर मन्त्रिपरिषद् पुनर्गठन गरेपछि हिजोदेखि कांग्रेसले अन्य दलहरुलाई सहकार्यको प्रस्ताव गरिरहेको छ ।
नेपालसँगको भेटमा सहभागी कांग्रेस नेता रमेश लेखकले पछिल्लो समय विकसित राजनीतिक घटनाक्रमका बारेमा केन्द्रित रहेर अध्यक्ष नेपालसँग कुरा गरिएको बताउँदै छलफल सकारात्मक रहेको बताए । उनले छलफललाई निरन्तरता दिने जनाए ।
यसअघि, अध्यक्ष नेपाललाई भेट्न प्रधानमन्त्री प्रचण्ड र एमाले अध्यक्ष केपी शर्मा ओली मंगलबार साँझ कोटेश्वर पुगेका थिए । नेपाल र ओलीबीच तीन वर्षपछि औपचारिक रुपमा भेट भएको थियो ।
कांग्रेसले रास्वाप, जसपा र राप्रपासँग पनि छलफललाई निरन्तरता दिइरहेको छ । प्रचण्डले आफुलाई धोका दिएको निस्कर्षमा पुगेका देउवाले नयाँ गठबन्धनको पक्षमा बहुमत पुर्याउन नदिने रणनीतिअनुसार अन्य दलहरुसँगको भेटघाट र प्रधानमन्त्रीसम्मको अफरलाई तिब्र बनाएका हुन् ।
प्रतिक्रिया