आइतबारदेखि बेपत्ता नाबालिकाको शव जनावरले खाएको अवस्थामा भेटियो

खजुरा । आइतबार रातीदेखि बेपत्ता भएकी खजुरा गाउँपालिका ६ की एक नाबालिकाको शव फेला फेला परेको छ । खजुरा ६ सिमलघारीका वीरेन्द्र पुनकी अन्दाजी ढाई वर्षीया छोरी लक्ष्मी पुनको शव बिहान घर नजिकै रहेको जङ्गलमा आज फेला परेको हो ।

खोजतलासका क्रममा बेपत्ता नाबालिकाको घर नजिकैको जङ्गलबाट मंगलबार बिहान ११ बजे शव फेला परेको प्रहरीले जनाएको छ ।

बालिकाको घरदेखि करिब १ किलोमिटर पश्चिमतर्फको जङ्गलमा बालिकाको टाउको र एउटा खुट्टा फेला परेको इलाका प्रहरी कार्यालय खजुराका प्रहरी निरीक्षक पुर्ण केसीले जानकारी दिए । जङ्गली जनावरले खाएर बाँकी रहेको अवस्थामा टाउको र एउटा खुट्टा फेला परेको उनले जानकारी दिए ।

उनका अनुसार बालिका पुनलाई बाघ वा चितुवाले खाएको अनुमान गरिएको छ । सोमबार स्थानीयबासीले बालिकाको खोतलासका क्रममा बाघ देखेको बताएका छन् । स्थानीयलाई देखेपछि बाघ रुख चढ्न खोजेको र बाघ देखेपछि स्थानीयको भागाभाग भएको खोजतलासमा संलग्न एक स्थानीयले बताए । शव भेटिएको स्थानमा बाघको पाईला देखिउकाले बाघले नै बालिका खाएको हुनुपर्ने प्रहरी निरीक्षक केसीले बताए ।

बेपत्ता बालिकाको खोजिमा सोमबार दिनभर सशस्त्र प्रहरी, प्रहरीको तालिम प्राप्त कुुकुर सहित नेपाल प्रहरी, बनका कर्मचारी र स्थानीयबासी खटिएका थिए भने आज बिहान बनका कर्मचारी, नेपाल प्रहरी र स्थानीयले खोजतलास गर्ने क्रममा बालिकाको शव फेला परेको हो ।

मृतक बालिका आइतबार राती करिब ८ बजेको समयमा आफ्नै घरको आँगनमा खेलिरहेको अवस्थामा एकाएक बेपत्ता भएकी थिइन् । उनलाई बाघले लगेको हुन सक्ने आशङ्का गरिएको थियो ।