भेरी अस्पतालमा प्रत्यक्ष शल्यक्रिया गरेर नयाँ शल्यक्रिया कक्षको उदघाटन

नेपालगन्ज । भेरी अस्पताल नेपालगन्जले आजदेखि नव निर्मित नयाँ भवनबाट शल्यक्रिया सेवा दिन सुरु गरेको छ । नयाँ शल्यक्रिया कक्षको प्रत्यक्ष शल्यक्रिया गर्दै उदघाटन गरिएको छ । वरिष्ठ अर्थोस्कोपी सर्जन प्रा.डा. अमित जोशीले प्रत्यक्ष शल्यक्रिया गर्दै नयाँ भवनमा जडान भएको शल्यक्रिया कक्ष्को उद्घाटन गरेका हुन् ।

अर्थोस्कोपी कार्यशालामा सहभागि हुन नेपालगन्ज आएको अवसरमा डा. जोशीबाट शल्यक्रिया कक्षको उद्घाटन गराइएको अस्पतालका मेसु डा प्रकाश बहादुर थापाले जानकारी दिए । घुँडाको भित्रि भागमा चोट लागेर घाइते भएका नेपालगन्जका १८ वर्षीय युवकको शल्यक्रिया गर्दै डा. जोशीले भेरीको नयाँ भवनको शल्यक्रिया कक्षको उद्घाटन गरेका थिए ।

प्रा.डा. जोशीले कार्यशालाका सहभागि आर्थोकोपी सर्जन तथा अर्थोपेडिक सर्जनहरुसँग लाइभ भिडियो संवाद गर्दै शल्यक्रिया गरेका थिए भने शल्यक्रियाको भिडियो लाइभ गरिएको थियो ।

शल्यक्रियाका क्रममा सर्जनहरुले राखेको जिज्ञासाहरुको प्रा.डा. जोशीले जवाफ दिएका थिए । करिव एक घण्टा लगाएर गरिएको शल्यक्रिया प्रत्यक्ष सहित अन्तरक्रियात्मक भएको मेसु थापाले बताए ।