भक्तपुर । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले संयुक्त सरकार बनेपछि पार्टी पंक्ति खुसी रहेको बताएका छन् । आज नेपाली कांग्रेस जिल्ला कार्यसमिति भक्तपुरले आयोजना गरेको शुभकामना आदानप्रदान कार्यक्रममा बोल्दै सभापति देउवाले वर्तमान सरकारलाई सफल बनाउन कांग्रेस लाग्ने र सहमतिअनुसार नै सरकार सञ्चालन हुने बताए ।
उनले प्रधानमन्त्री केपी शर्मा ओली नेतृत्वको सरकारले एक सय दिनमा राम्रो काम गरेको दाबी गर्दै प्रधानमन्त्रीले आगामी दिनमा राम्रा काम गर्दै जाने बिश्वास ब्यक्त गरे । उनले कांग्रेस सरकारमा भएकाले मात्र राम्रो काम भएको नभई प्रधानमन्त्री ओलीले साँचै राम्रो काम गरेको बताए ।
सभापति देउवाले आलोचनालाई आफुले खराब नमानेको बताउँदै आलोचनालाई तथ्यपरक ढङ्गले सरकारले ध्यान दिने जनाए । सरकारलाई आइपर्ने समस्या समाधानका लागि आफ्नो तर्फबाट पुरापूर सहयोग रहने उनले बताए । विपक्षीबाट आएका आलोचनालाई पनि गम्भीरताका साथ लिएर अहिलेको सरकारले परिणाममुखी काम गरेर देखाउनु पर्ने देउवाको भनाई छ ।
तथा जय नेपाल भक्तपुर स्मारिका लोकार्पणका अवसरमा उनले सरकारलाई पार्टीको तर्फबाट कुनै किसिमको अवरोध नहुने समेत उल्लेख गरे ।
उनले नेमकिपाका नेता नारायणमान बिजुक्छें प्रति लक्षित गर्दै भक्तपुरमा जे पनि गर्न पाइन्छ भन्ने सोँच त्याग्न बिजुक्छेंलाई सुझाए । ‘भक्तपुरमा नेमकिपाका अध्यक्ष नारायणमान बिजुक्छेँ हुनुहुन्छ, जिल्लाका सबै पार्टीलाई मिलाएर लैजानु पर्ने उहाँको पनि दायित्व हो, भक्तपुर मात्रै हाम्रो हो भन्ने ठान्नुभएन र भक्तपुरमा जे पनि गर्न पाइन्छ भन्न पनि पाइदैन ।’ देउवाले भने ।
प्रतिक्रिया