बुटवल । नेपाल पत्रकार महासंघको अधिवेशनबाट निर्वाचित भएकालाई बुद्ध सामुदायिक टेलिभिजनले सम्मान गरेको छ । मंसिर २८ गते सम्पन्न महासंघको केन्द्र, प्रदेश र जिल्लामा विभिन्न पदमा निर्वाचित भएका पत्रकारलाई टेलिभिजनले एक कार्यक्रमको आयोजना गरि सम्मान गरेको हो ।
टेलिभिजनका सल्लाहकार रामराज पोखरेल केन्द्रीय सदस्य, कार्यकारी प्रमुख कपिल ज्ञवाली प्रदेश पार्षद, समाचार संयोजक ललित कुमार पाण्डेय जिल्ला सदस्य पद र संबाददाता तथा समाचार बाचक छाया पन्त प्रदेश पार्षदमा निर्वाचित भएका हुन । यस्तै जिल्ला सदस्य पदमा संवाददाता कल्पना डुम्रे ज्ञवाली, दिनेश कुमार श्रेष्ठ, राम भण्डारी, रबिन्द्र गुप्ता र अनिता चौधरी निर्वाचित भएका हुन ।
सम्मान कार्यक्रममा बोल्दै टेलिभिजनका अध्यक्ष ओम ज्ञवालीले जुनसुकै संघ-संगठनमा आवद्ध भएर निर्वाचित भएपनि पत्रकारिता गर्दा निष्पक्ष हुनुपर्नेमा जोड दिए । उनले पत्रकारले निष्पक्ष भएर समुदायलाई केन्द्रमा राखेर पत्रकारिता गर्नको लागि सुझाव दिए ।
यस्तै नेपाल पत्रकार महासंघको केन्द्रीय सदस्य पदमा निर्वाचित तथा टेलिभिजनका सल्लाहकार रामराज पोखरेलले निर्वाचित हुनुभन्दा पनि कार्यकाललाई सफल राख्नु महत्वपूर्ण रहेको बताए । नेपाल पत्रकार महासंघ रुपन्देहीका अध्यक्ष समेत रहेका उनले महासंघलाई साझा संस्थाको रुपमा स्थापित गर्दै नमुना शाखा बन्न सफल भएको दाबी गरे ।
यस्तै वरिष्ठ पत्रकार हरिश ढकालले अहिले निर्वाचित भएकाले पत्रकार महासंघ र पत्रकारिताको मर्यादा कायम राख्दै पत्रकारको हक-हित संरक्षणमा गम्भिर भएर लाग्नको लागि सुझाव दिए ।
यस्तै कार्यक्रममा टेलिभिजनका उपाध्यक्ष गोपाल ज्ञवाली, सचिव जेबी गुरुङ, कार्यकारी प्रमुख कपिल ज्ञवाली लगायतले बोलेका थिए । कार्यकारी प्रमुख ज्ञवालीले बुद्ध सामुदायिक टेलिभिजनमा डेक्स र जिल्ला संवाददातामा आवद्ध भएका १७ जना पत्रकार नेपाल पत्रकार महासंघको अधिवेशनबाट निर्वाचित भएको जानकारी दिए ।
प्रतिक्रिया