नेपालगन्ज । अर्कैको जग्गाको नक्कली जग्गा धनी श्रेस्ता बनाई बैंकमा धितो राखेर बैंकबाट रकम निकाल्ने ३ जनालाई प्रहरीले पक्राउ गरेको छ । नक्कली लालपुर्जा तयार गरि बैंकमा धितो राखेर रकम ठगी गर्ने कार्यमा संलग्न ३ जनालाई काठमाडौं प्रहरीको सहयोगमा बाँके प्रहरीले पक्राउ गरेको हो ।
पक्राउ पर्नेमा काभ्रेपलान्चोक बनेपा नगरपालिका वडा नं.१ का गौरव कार्की, ईश्वरी माया रोका र बारा जितपुर नगरपालिका वडा. ३ का दिलिप कुमार सिंह रहेका छन् । उनीहरुलाई काठमाडौंबाट पक्राउ गरिएको प्रहरीले जनाएको छ ।
प्रहरीका अनुसार पक्राउ परेकाहरुले बाँके डुडुवा -५ मा जुम्ला चन्दननाथ नगरपालिका वडा -८ बस्ने रेशमा श्रेष्ठको नाममा दर्ता श्रेष्ता कायम रहेको कित्ता नम्बर ९५१ र ९५२ क्षेत्रफल ११,०६०.३८ बर्गमिटर (१ बिहगाहा १३ कठ्ठा) जग्गाको नक्कली जग्गा धनी पुर्जा बनाएर बैंकमा धितो समेत राखेका थिए । ।
पक्राउ परेकाहरुले नक्कली जग्गाधनी पुर्जा बनाई मुक्तिनाथ विकास बैंक लिमिटेड लगनटोल काठमान्डौबाट रु १ करोड २० लाख रकम कर्जा लिएको जिल्ला प्रहरी कार्यालय बाँकेका प्रवक्ता डिएसपी आयूश प्रसाद जोशीले जानकारी दिए ।
बैंकबाट कर्जा खडा गरेर प्राप्त रकम बाँडि ठगी गरेको अभियोगमा काठमाडौं प्रहरीको सहयोगमा काठमाडौंको बुद्दनगर र कोटेश्वरबाट पक्राउ गरि जिप्रका बाँकेमा ल्याई अनुसन्धान भईरहेको डीएसपी जोशीले बताए ।
प्रतिक्रिया