खजुरा । बाँकेको खजुरा गाउँपालिका ४ स्थित डि गाउँ थपपलटमा आज आगलागी भएको छ । दिनको अन्दाजी ३ बजेतिर लागेको आगलागीबाट स्थानीय लाल बहादुर रोकायाको घर गोठ जलेर नष्ट भएको छ ।
माटोको दिवाल र टायलले छाएको घर र खरले छाएको गोठ पुन प्रयोग गर्न नमिल्ने गरी नष्ट भएको छ भने घरमा भएका आवश्यक कागजपत्र देखि खाद्यान्न, लत्ता कपडा आगलागीबाट नष्ट भएको स्थानीयले बताएका छन् । आगलागीबाट मानवीय क्षति भने नभएको प्रहरीले जनाएको छ ।
रोकाया परिवार खेतमा मसुरो काट्न गएका बेला एक्कासी घर गोठमा आगलागी भएको छिमेकीले खबर गरेको रोकायाले बताए । आगलागी नियन्त्रणमा स्थानीय जुटेपनि सम्भव नभएपछि नेपालगन्ज उप महानगरपालिकाको दमकल बोलाइएको थियो । दमकल आउा ढिला गरेका कारण सम्पूर्ण घर गोठ जलेर नष्ट भएको नागरिक आरोग्य केन्द्रका कर्मचारी समेत रहेकी पीडित लाल बहादुर रोकायका बुहारी सविना केसी रोकायले जानकारी दिइन् ।
अन्दाजी १० लाख बढीको नोक्सान भएको इलाका प्रहरी कार्यालय धनौली खजुराले जनाएको छ । रोकायाको थप घर जल्न नदिन प्रहरी र स्थानीय बासिन्दा आगो निभाउन जुटेका थिए । आगलागीका कारण रोकाया परिवार घरबार बिहिन बनेका छन् ।
प्रतिक्रिया