प्रतिनिधिसभाको दोस्रो बैठकमा पनि प्रतिपक्षी दलहरूको अवरोध, भोलिसम्म बैठक स्थगित

काठमाडौं । प्रतिनिसभाको दोस्रो बैठकमा पनि विपक्षी दलहरुले अवरोध गरेका छन् ।

दोस्रो बैठकको कार्यप्रारभ्भ हुनेवित्तिकै प्रतिपक्षी सांसदहरु उठेर कुलमान घिसिङमाथि गरिएको कारवाहीबारे प्रधानमन्त्री रोस्टममा आएर जवाफ दिनुपर्ने माग राखेका छन् । उनीहरुले प्रधानमन्त्रीले जवाफ नदिएसम्म बैठक अघि बढ्न नसक्ने जिकिर गरे ।

सभामुख देवराज घिमिरेले बस्नका लागि आग्रह गरेर बैठक संचालनको वातावरण बनाउन आग्रह गरे । तर सभामुखको आग्रह अनुसार सांसदहरु आआफ्नो सीटमा नबसेपछि बैठक भोलि १४ गते बिहीबार बिहान ११ बजे बस्ने गरी स्थगित भएको छ ।

यसअघि आजै बिहान ११ बजे बसेको बैठकमा पनि प्रतिपक्षी दलहरुले अवरोध गरेका थिए । त्यसपछि बैठक आधा घण्टाका लागि भन्दै स्थगित भएको थियो ।

संसद भवनबाट बाहिर निस्कँदै प्रमुख प्रतिपक्षी दलका नेता प्रचण्डले कुलमानबारे प्रधानमन्त्रीले रोष्टमबाट जवाफ दिनुपर्ने र सो जवाफ चित्तोबुझ्दो नभए पुनः अवरोध हुने बताएका थिए ।