राजावादी आन्दोलनका क्रममा २ जनाको मृत्यु

काठमाडौं । काठमाडौंको तीनकुनेमा राजावादी समूहले गरेको आन्दोलनका क्रममा मृत्यु हुनेको संख्या २ पुगेको छ ।

तीनकुनेस्थित चौरमा राष्ट्र, राष्ट्रियता, धर्म संस्कृति एवम् नागरिक बचाऊ महाअभियानका नाममा भएको प्रदर्शनका क्रममा प्रहरीसँग भएको झडपमा कीर्तिपुर नगरपालिका(४ गाम्चा घर भएका २९ वर्षीय सबिन महर्जनको मृत्यु भएको छ ।

प्रहरीका अनुसार झडपका क्रममा उनको छातीमा गोली लागेको थियो । गोली लागेपछि ढलेका उनलाई त्रिवि शिक्षण अस्पतालको इमर्जेन्सी कक्षमा दिउँसो ३ बजेर ५५ मिनेटमा उपचारका लागि लगिएको थियो।

उनलाई त्यहाँका चिकित्सकले अपरान्ह ४ बजे मृत घोषणा गरेका थिए । अहिले उनको शव पोस्टमार्टमका लागि त्रिवि शिक्षण अस्पतालको पोस्टमार्टम गृहमा राखिएको प्रहरीले जनाएको छ।

यसअघि एभिन्युज टेलिभिजनका क्यामेरा पर्शन सुरेश रजकको राजावादीले गरेको आगजनीमा परेर मृत्यु भएको थियो । तीनकुने स्थित एक निजी घरको माथिल्लो तलाबाट आन्दोलनको भिडियो खिचिरहेका रजक रहेको घरमा आन्दोलनकारीले तलबाट आगजनी गरिदिएका थिए । आगोमा डढेको रजकको शवलाई एभिन्युज टेलिभिजनका अध्यक्ष एवं राजावादी आन्दोलनका समर्थक भास्करराज कर्णिकारले सनाखत गरेका थिए ।