शंकर पोखरेलको टिप्पणी – ज्ञानेन्द्रको ‘थ्रेट’का सामु राप्रपा निरिह

काठमाडौं ।नेकपा एमालेका महासचिव शंकर पोखरेलले ज्ञानेन्द्र शाहको योजनामा तीनकुनेमा हिंसा मच्चाइएको आरोप लगाएका छन् ।

सामाजिक सञ्जाल फेसबुकमा स्टाटस लेख्दै महासचिव पोखरेलले बंगलादेशको मोडेलमा सत्तापलट गर्ने पूर्वराजा ज्ञानेन्द्र शाहको योजना कार्यान्वयन गर्न तीनकुनेमा आपराधिक क्रियाकलाप गरेको आरोप लगाएका हुन् ।

पोखरेलले अहिले राजावादीहरू आपाधिक क्रियाकलापको भारी सुरक्षाकर्मीलाई बोकाएर पानीमुनिको ओभानो बन्न खोजिरहेको पनि टिप्पणी गरेका छन् । उनले भनेका छन्, ‘बंगलादेशको मोडेलमा सत्तापलट गर्ने पूर्वराजा ज्ञानेन्द्रको योजना कार्यान्वयन गर्न ‘जनकमाण्डर’ तोकिएका दुर्गा प्रसाईद्वारा परिचालित गरिएका हुल्लडवाजहरूले गरेको आपराधिक क्रियाकलापको भारी सुरक्षाकर्मीलाई बोकाएर पानीमुनिको ओभोने बन्न खोजिरहेका छन् राजावादीहरू । तर, खुला समाजमा सबै कुरा छर्लङ्ग नै छ’, उनले भनेका छन् ।

महासचिव पोखरेलले निर्मल निवासको ‘थ्रेट’ सामु राजावादीहरू निरीह भएको टिप्पणी समेत गरेका छन् । उनले राप्रपालाई संकेत गर्दै भनेका छन्’, – ‘राजावादी र पूर्व पंचहरुले यो सबै अपराधको भारी दुर्गा प्रसाई र उनका अनुचरलाई वोकाएर उम्कन खोजेको भए थोरैभएपनि विश्वास गर्थे होला नेपाली जनताले । घटना घटेको दिनसम्म राप्रपाको संस्थापन पक्षलाई लागेको त यस्तै थियो । तर निर्मल निवासको ‘थ्रेट’का सामु उनीहरु निरही देखिए र भन्न थाले ‘प्रहरी दमनको प्रतिरोध गरेका हुन् आन्दोलनकारीले’।’