काठमाडौं । नेकपा (एमाले)का महासचिव शंकर पोखरेलले गृहमन्त्रीमा सुधन गुरुङको पुनर्नियुक्तिप्रति व्यङ्ग गर्दै राष्ट्रिय स्वतन्त्र पार्टीको ‘जान्नेलाई छान्ने’ नारामाथि कडा टिप्पणी गरेका छन्।
गुरुङ पुनः गृहमन्त्री नियुक्त भएपछि सामाजिक सञ्जाल फेसबुकमार्फत प्रतिक्रिया दिँदै पोखरेलले ‘जान्नेलाई छान्ने’ अभियान नै भ्रष्ट भएको टिप्पणी गरेका हुन्।
उनले आफ्नो स्टाटसमा देशविरुद्धका गतिविधिलाई सामान्य ठान्ने, राज्यविरुद्धका विध्वंसात्मक अपराधलाई बहादुरीका रूपमा प्रस्तुत गर्ने, स्वार्थमा आधारित ‘सेटिङ’लाई विधि बनाउने, अर्थ विधेयकजस्तो संवेदनशील दस्तावेजमा गैरकानुनी छेडछाड गर्ने, अवैध धनको स्रोतलाई प्रणालीको कमजोरीका रूपमा व्याख्या गर्ने तथा आफ्ना पक्षधरलाई उन्मुक्ति दिने प्रवृत्तिको आलोचना गरेका छन्।
पोखरेलले यस्ता गतिविधिलाई योग्यता नभई पाखण्डको संज्ञा दिँदै यसले स्वेच्छाचारिता, पक्षपात र भ्रष्टाचारलाई संस्थागत गर्ने दाबी गरेका छन्।
उनले सुशासन र तीव्र विकासका लागि विगतका कमजोरी सुधार्न आवश्यक भए पनि त्यसका नाममा नयाँ विकृति र अनियमिततालाई स्वीकार गर्न नसकिने उल्लेख गरेका छन्।
प्रतिक्रिया